Тыа хаһаайыстыбатын салаата миллиартан тахса субсидияны ылыаҕа

Бүддьүөт төһө уустугун иһин тыа хаһаайыстыбатын өйөөһүн намтыа суоҕа – быйыл үбүлээһин миллиард солкуобайынан улаатыа. Бу туһунан Айсен Николаев Ил Түмэҥҥэ отчуоттууругар иһитиннэрдэ.

“Былырыын сыл бүтүүтэ норуот дьокутааттарын кытта тыа хаһаайыстыбатын производствотын өйүүр тиһиги уларыппыппыт. Миэстэтигэр оҥорон таһаарыы уратыларын учуоттаан, улуустар дьаһалталара билигин бэйэлэрэ тыаларын хаһаайыстыбатын сайыннарыыны хайдах ыыталларын быһаараллар.  Кинилэргэ 15 хайысханан 8,9 млрд солкуобайга тиийэ субвенцияны улаатыннаран өйүүр судаарыстыбаннай боломуочуйаны биэрдибит”, — диэтэ Ил Дархан.

Улуустар боломуочуйалара улааппытын түмүгэр сыл бүтүөр диэри 40 саҥа производственнай эбийиэк, ону тэҥэ 20-тэн тахса үлэлии турар эбийиэктэри өрөмүөннээһин уонна саҥардыы барара күүтүллэр.