Тыа сирдэригэр өссө 18 земскэй тириэньэр үлэлиэ

Быйыл «Земскэй тириэньэр» бырагыраама иитинэн 18 миэстэ көрүллүбүт. Бу туһунан СӨ физическэй култууратын уонна успуордун министиэристибэтиттэн иһитиннэрдилэр.

Бырагыраама РФ Бэрэсидьиэнэ Владимир Путин быһаарыытынан эрэгийиэннэргэ олоххо киллэриллэр уонна тыа сиригэр үрдүк бэлэмнээх исписэлиистэри тардыыга туһуланар.

Сайаапкалары ылыы ыам ыйыгар саҕаланар, тустаах иһитиннэрии СӨ физическэй култууратын уонна успуордун министиэристибэтин официальнай саайтыгар уонна биэдэмистибэ социальнай ситимнэригэр ыытыллыаҕа. Судаарыстыбаттан өйөбүлгэ үрдүк эбэтэр орто анал үөрэхтээх исписэлиистэр, биэс сылтан итэҕэһэ суох толору үлэлииргэ дуогабар түһэрсэллэр.

—Былырыын өрөспүүбүлүкэҕэ «Земскэй тириэньэр» бырагырааманы олоххо киллэрэн саҕалаабыппыт. Куонкурус түмүгүнэн үс тириэньэр улуустарга үлэлиир. Быйыл 18 штатнай единица көрүлүннэ. РФ успуордун министиэристибэтэ бырагыраамаҕа уларытыылары киллэрдэ. Өскөтүн былырыын спортивнай бэлэмнэниини олоххо киллэрэр оҕо-ыччат спортивнай оскуолалара эрэ киирсэр эбит буоллахтарына, билигин оҕо-ыччат успуордун бары тэрилтэлэрэ киирэллэр, — диэн физкултуура уонна успуорт министрэ Леонид Спиридонов бэлиэтиир.

2025 сыллаахха бырагыраамаҕа кыттарга биэс сайаапка киирбитэ. Куонкурус түмүгүнэн үс исписэлиис кыайыылааҕынан буолбута уонна 2 000 000 солк. суумалаах биир кэмнээх компенсацияны ылбыттара. Хас биирдиилэрин кытта үс өрүттээх дуогабар түһэрсиллибитэ.

Бойобуой дьайыылар бэтэрээннэрэ Петр Парников Мэҥэ Хаҥаласка И.Г.Игнатьев аатынан успуорт оскуолатыгар (Хара) көҥүл тустууга тириэньэринэн анаммыта. Петр Суздалов Хаҥалас улууһугар ДЮСШ көҥүл тустуу тириэньэрэрэ. Мария Охлопкова Жатайга ДЮСШ шахмакка оҕолору эрчийэр.

—Билигин 35 оҕо дьарыктанар. Кинилэри кытта үлэлээн кыра да уларыйыыны, сайдыыны көрөр наһаа интэриэһинэй. Мин олорор усулуобуйабын, үлэлиир кэлэктииппин, нэһилиэк олохтоохторун сөбүлээтим. РФ Бэрэсидьиэнэ Владимир Путин көҕүлээһининэн бу олус наадалаах «Земскэй тириэньэр» бырагыраама үлэҕэ киирдэ. Эдэр исписэлиистэр кыттыыны ылалларыгар сүбэлиибин. Бу сөбүлүүр үлэҕинэн дьарыктанарга, сөптөөх үлэ ыстаастанарга, дьиэ боппуруоһун быһаарарга кыаҕы биэрэр. Дьокуускайга икки хостоох кыбартыыра атыылаһар былааннаахпын. Дойду уонна өрөспүүбүлүкэ салалталарыгар тыа сиригэр үлэлиир эдэр исписэлиистэри өйүүллэригэр махтанабын, — диэн эдэр исписэлиис Петр Парников санаатын үллэстэр.

Бу кэм устатыгар кини иитиллээччилэрэ хас да турнирга кыттан бириистээх миэстэлэри ылбыттар. Бу үлэтин саҥа саҕалаан эрэр тириэньэргэ үчүгэй көрдөрүү диэн успуорт министиэристибэтигэр бэлиэтииллэр.

РФ Бэрэсидьиэнин сорудаҕынан 2025 сыллаахха бырагыраама Уһук Илиннээҕи уонна Киин федеральнай уокуруктарга үлэлээбитэ, онтон 2026 сылтан дойду үрдүнэн олоххо киллэриллэр. РФ Бэрэсидьиэнэ Владимир Путин көҕүлээбит «Земскэй тириэньэр» бырагыраама тыа сиригэр успуорду сайыннарарга, судаарыстыбаттан өйөбүлү ыларга уонна професионадьнай потенциалы олоххо киллэрэргэ туһуланар. Бу бырагырааманы олоххо киллэрии «Спорт России» федеральнай судаарыстыбаннай бырагыраама сыалын-соругун толорууга сөп түбэһэр.

Санатан эттэххэ, Ил Дархан Айсен Николаев Ил Түмэҥҥэ Туһаайан этиитигэр усулуобуйа наадатын, доруобай эйгэ, успуордунан дьарыктанар кыах наадатын бэлиэтээбитэ.

—Бу хайысхаҕа үлэ баран иһэр. Успуорт комплекстара, стадионнар, катоктар, бассейннар тутуллаллар, 2020 сылтан улуустарга 40 улахан спортивнай эбийиэктэр тутуллан үлэлииллэр. Хас биирдии саҥа оскуола уонна уһуйаан хайаатар даҕаны успуорт саалаларынан, былаһааккаларынан хааччыллаллар. Түмүктэр бааллар, ол курдук биэс сыл иһигэр успуордунан, физкултууранан дьарыктанар дьон ахсаана балтараа төгүл элбээтэ уонна 62,5% тиийдэ. Биһиги иннибит диэки салгыы барыахтаахпыт, статистиканан эрэ буолбакка, бүддьүөт тэрилтэлэригэр эрэ буолбакка, бу эйгэҕэ өҥө хаачыстыбатын тупсарыахтаахпыт.

Сиһилии: https://www.sakha.gov.ru/news/26424

СӨ Ил Дарханын уонна Бырабыыталыстыбатын пресс-сулууспата