Тыа сиригэр оҕо төрөөһүнэ эбиллэр

Бүгүн «Патриот» киинигэр буолан ааспыт пресс-кэмпириэнсийэҕэ Ил Дархан Айсен Николаев суруналыыстар ыйытыыларыгар хоруйдаан, өрөспүүбүлүкэҕэ дьиэ кэргэни өйүүр дьаһаллар тустарынан кэпсээтэ уонна демографическай бэлиитикэ 2025 сыллааҕы түмүктэрин сүрүнүн бэлиэтээтэ.

«Демография боппуруостарын ырытыы биһиги өрөспүүбүлүкэбит эрэ буолбакка, бүтүн дойдубут иннигэр турар сүрүн сорук, ордук биһиги сирбитин-уоппутун кээмэйин учуоттаатахха, ол биһиги иннибитигэр улахан соруктары туруорар. Өссө даҕаны дьиэ кэргэни өйүүр дьаһаллар салҕаныахтара. Быйыл чуолаан, дьиэ кэргэн хапытаалын суумата биллэрдик үрдээбитэ уонна «100 сыл оҕолоро» тус сыаллаах бырагыраама өссө биир сыл уһытыллыбыта», — диэтэ Ил Дархан.

Айсен Николаев Саха сирэ Уһук Илин федеральнай уокуругар оҕо төрөөһүнүгэр инники күөҥҥэ сылдьарын, ол эрээри Арассыыйаҕа бастакы миэстэҕэ сылдьарын үрдүнэн, бу көрдөрүү намтыыр кутталлааҕын бэлиэтээтэ. Өрөспүүбүлүкэ баһылыга эппитинэн, төһө даҕаны уустук күннэн үүммүттэрин үрдүнэн, бриэмэтигэр сөптөөх өйөбүл дьаһаллара ылылланнар уонна үбүлээһин көстөн, дьиэ кэргэн ылар өйөбүлэ оҥоһуллар. Оҕо төрөөһүнэ 2025 сыл 11 ыйын түмүгүнэн ааспыт сыллардааҕар түспүтүн бэлиэтээтэ. «Оҕо төрөөһүнүгэр биһиги быйылгы сылга өссө улахан намтааһыны күүппүппүт, ол эрээри тыа сиригэр уонна Нерюнгрига, төттөрүтүн, үрдээһин бэлиэтэнэр. Саамай улахан намтааһын Дьокуускай куоракка бэлиэтэнэр», — диэн Ил Дархан эттэ.