Чурапчыларга үөрүүлээх күн
Тыа сиригэр билигин оттооһун саҕаланна. Урукку буолбатах, илии хотуурунан охсооччу аҕыйаан иһэр, дьон үксэ тиэхиньикэнэн оттуур. Ол курдук, тыраахтары хото туһаналлар.
Куйаар ситиминэн тырахтарыыска наадыйабыт диэн биллэриилэр тарҕанар буоллулар. Онон сылыктаатахха, ыйыталаһан да биллэххэ, тыраахтары ыытар көҥүллээх киһи сотору кэминэн дэписсиит да буолуох курдук. Бу төрүөтүнэн, арааһа, кэнники кэмҥэ бу идэҕэ бэлэмниир кыһалар аҕыйаан иһэллэрэ буолуон сөп. Урут, холобура, Алтаннааҕы СПТУ тыа сиригэр, тыа хаһаайыстыбатыгар наадалаах тырахтарыыстары бэлэмнээн таһаарбытын бары билэбит.
Тиэхиньикэнэн эҥин дьарыктанар дьон этэллэринэн, Саха сиригэр уонча тыһыынча тыраахтар баар курдук. Анаан-минээн учуоттааһын, ааҕыы ыытыллар буоллаҕа. Дьиҥэ, бу ахсаантан элбээтэҕэ буолуо дии саныыгын. Илин эҥээр уонна киин улуустарга тыраахтардара элбэх. Сорохтор этэллэринэн, ыал аайы да баар курдук.
Тыа сиригэр тыраахтар элбээһинигэр СӨ Тыатын хаһаайыстыбатын уонна ас-үөл бэлиитикэтин министиэристибэтин (миниистир А. Александров) көмөтө баһаам эбит. “Сылгыны үөрдээн иитиини сайыннарыы” бырагырааматынан уопсайа быйыл 59 тыраахтары түҥэппиттэр. Онон күүстээх тиэхиньикэлэр Мэҥэ Хаҥалас, Уус Алдан, Таатта, Горнай, Нам, Чурапчы, Сунтаар, Дьааҥы, Үөһээ Бүлүү улуустарыгар айаннаабыттар. Уонна үгүстэрин хаһаайыстыбалар оттооһуҥҥа күүскэ туһаналлара эрэбил.
Холобура, Горнай улууһун Кировскай нэһилиэгин сылгы иитэр үс бааһынай хаһаайыстыбата быйыл тиэхиньикэни ылыыга субсидияҕа кыттан, үһүөн ааспыттар. 2 тыраахтары аҕалбыттар уонна 1 УАЗ-фермери. Манна кыттыыга усулуобуйата диэн, хаһаайыстыба 50 төбөттөн элбэх сылгылаах буолуохтааҕа ирдэммит.
— Нэһилиэккэ тыраахтардаах ыал элбэх. Ол да буоллар, быйыл Тыа хаһаайыстыбатын министиэристибэтин нөҥүө тыраахтардары “Федотов Р. Е.” ИП-тан ыллыбыт. Былырыын бу субсидияҕа эмиэ кыттыбыппыт да, кыайан ааспатахпыт. Быйыл сайаапкабытын эрдэ түһэрэн хапсаммыт, үөрэн олоробут. Бу тыраахтардар хаһаайыстыбаларга көмө бөҕө буолуохтара. Биллэн турар, манна кыттарга докумуон эҥин хомуйсуохтааххын. 60 бырыһыанын министиэристибэ, 40 быр. хаһаайыстыба бэйэтэ уйунуохтаах диэн ирдэбиллээх, — диэн санаатын үллэһиннэ нэһилиэк дьаһалтатын тыа хаһаайыстыбатыгар исписэлииһэ Станислав Андреев.
Манан да көрдөххө, тустаах министиэристибэ анал бырагыраамалары үчүгэйдик үлэлэтэрэ тыа дьоно тиэхиньикэлээх буоларыгар төһүү буолууһу.
“Сылгыны үөрдээн иитиини сайыннарыы” бырагыраама туһалааҕын хаһаайыстыбалар билэн эрэллэр. 2024 сылтан саҕалаан бырагыраамаҕа уларыйыылар киирэннэр, матырыйаалынай-тиэхиньиичэскэй баазаны хаҥатыы диэнэ тиэхиньикэнэн хааччыйыы дэммитэ. Чурапчы улууһунааҕы тыа хаһаайыстыбатын управлениетын начаалынньыга Анжелика Неустроева этэринэн, былырыын Чурапчы улууһугар бу бырагырааманан 20 хаһаайыстыба туһаммыт. Быйыл хаһаайыстыбалар эмиэ тиэхиньикэҕэ тиксибиттэр. Онно Степан Саргыдаев баһылыктаах улуус сылгытын ахсаанынан инники иһэрэ төһүү буолбута чахчы. 10 кэпэрэтииби сэргэ бааһынай хаһаайыстыбалар күүскэ дьарыктаналлар. Онон хаһаайыстыбаларга тыраахтардар күлүүстэрин туттарар үтүө түгэн Аллараа Бэстээххэ тосхойбут.
Ол туһунан Аллараа Бэстээххэ таһаарыылаахтык үлэлиир “Федотов Р. Е.” ИП салайааччыта, биллэр урбаанньыт Руслан Федотовтан сонуну биир бастакынан истибиппит.
Р. Федотов бииргэ үлэлэһэр Минскэйдээҕи собуотуттан кэлбит араас мааркалаах тыраахтардары хороҕор муостааҕы, сыспай сиэллээҕи иитэр хаһаайыстыбалар ылбыттарын туһунан урбаанньыт эттэ.
Саҥа тыраахтардар сэртипикээттэрин Руслан Федотов уонна улуус баһылыга Степан Саргыдаев туттарбыттар.
Саҥа тыраахтардары, от мунньар тиэхиньикэлэри “Саппаас” ХЭУо дириэктэрэ Прокопий Старостин, “Комплекс” ХЭУо дириэктэрэ Александр Тимофеев, бааһынай хаһаайыстыба баһылыга Владимир Осипов, “Эргистайга” ХЭУо дириэктэрэ Семен Петров, чааһынай урбаанньыт Дмитрий Местников, чааһынай урбаанньыт Александр Неустроев, бааһынай хаһаайыстыба баһылыга Илья Дьячковскай, бааһынай хаһаайыстыба баһылыктара Егор Борисов, Николай Барашков уонна Петр Кривошапкин ылан барбыттар.
— Өрөспүүбүлүкэ үрдүнэн бачча элбэх тиэхиньикэни ылар улуус суоҕун тэҥэ. Бу тэрээһин Ил Дархаммыт, өрөспүүбүлүкэбит Бырабыыталыстыбата, улуус дьаһалтата, тыа хаһаайыстыбатын управлениета тыа хаһаайыстыбатын сайдыытыгар күүс-көмө буолалларын кэрэһилиир. Чурапчы этэ, арыыта, үүтэ — барыта дьон-сэргэ остуолугар тиийэ турар. Саамай окко киирэр эппиэттээх кэмҥэ ыллылар, — диэн Руслан Еремеевич эмиэ үөрүүтүн үллэстэр.
Галина Герасимовна Афанасьева, Нам улууһун Хатыҥ Арыы нэһилиэгин бааһынай хаһаайыстыбатын баһылыга:
— Былырыын куонкуруска кыттан, МТЗ‑82 тыраахтары ылбыппыт. Тыа хаһаайыстыбатын министиэристибэтэ
1 мөл. 250 тыһ. укпута. Ордугун бэйэбит төлөөбүппүт. Бу “Сылгыны үөрдээн иитиини сайыннарыы” бырагырааманан. Тыраахтарбыт күһүн кэлбитэ, онон кыһыҥҥы өттүгэр оппутун тиэнэн абыраммыппыт. Быйыл сайын окко туһанаары кэтэһэн олоробут. Уу кэлэ турар, бэйэбит бааржабыт суох. Онон атын нэһилиэктэртэн кэлэрин кэтэһэбит. Былырыын баччаларга оттоон ырааппыппыт, быйыл хойутаары гынныбыт.
БАЛАҺАНЫ ЖЕННИ СТРЮКОВА БЭЛЭМНЭЭТЭ
ХААРТЫСКАЛАРЫ: Р.ФЕДОТОВ, С.АНДРЕЕВ ТИКСЭРДИЛЭР
Быйыл Өймөкөөн улууһугар айылҕа иэдээнигэр түбэспит дьоҥҥо тута болҕомто ууруллан, олохтоохтор бэйэлэрин көмүскэллээх курдук санаммыттара.…
1980 сыллаахха Красноярскай кыраайга Саха литературатын уонна искусствотын күннэрэ ыытыллыбыттара. Онно Саха сирин артыыстара, суруйааччылара,…
“Олохтоох дьаһалта суһаллык тэриннэ” Биэрэк Үрдэ бөһүөлэк олохтооҕо Федор Шпнев Өймөкөөн улууһун хаһыатыгар кэпсээбитинэн, дэриэбинэҕэ…
Билигин Өймөкөөн улууһугар Арассыыйа ЫБМ СӨ Киин управлениетын быыһааччыларын суһал бөлөҕө уонна СӨ Быыһыыр сулууспатын…
От ыйын 19 күнүгэр 112 нүөмэргэ 11.37 мүнүүтэҕэ иһитиннэрии киирбит. Ол курдук, Хаандыга бөһүөлэгиттэн 238…
Сотору кэминэн Өймөкөөн улууһа улахан ууттан босхолонно да, айылҕа иэдээнин хоромньутун ааҕыы-суот саҕаланыаҕа. Бу күннэргэ…