Тыа сиригэр ыччаты олохсутуу, оҥорон таһаарыы

От ыйын 6 күнүттэн Мэҥэ Хаҥалас улууһун  Дьабыыл нэһилиэгин Чаачыгый сиригэр турар «Илгэ» оҕо сынньалаҥ лааҕырыгар Саха сирин Тыа хаһаайыстыбатын уонна ас-үөл бэлиитикэтин, өрөспүүбүлүкэ үөрэҕириитин уонна билимин министиэристибэлэрин холбоһуктаах кэллиэгийэтэ саҕаланна.

—Тыа хаһаайыстыбата — уруккубут, билиҥҥибит уонна сарсыҥҥыбыт. Онтон үөрэх — бу сарсыҥҥыбыт мэктиэтэ буолар. Модун Арассыыйа тирэнэр тирэҕэ — Саха сирэ, өрүспүүбүлүкэбит күүһэ — нэһилиэктэргэ, норуотугар. Биһиги иннибитигэр улахан соруктар тураллар: бастатан туран, тыа сиригэр ыччаты олохсутуу, ону хайдах ситиһэбит?
Тыабыт хаһаайыстыбатын инники сайдыытыгар аныгы кэм ирдэбилигэр эппиэттиир оҥорон таһаарыыны киллэриэхтээхпит уонна ол нөҥүө дьоммут-сэргэбит туруктаах буолууларын хааччыйыахтаахпыт.
Бүгүҥҥү күҥҥэ ыччаттарбытын бу эйгэҕэ кыра эрдэхтэриттэн сыһыараммыт саҥа үйэ технологияларын киллэрэммит толору баһылыыр усулуобуйа тэрийиэхтээхпит, нэһилиэктэрбитин сайыннарыахтаахпыт, төрөөбүт дойдубут экэниэмикэтэ тирэхтээх буоларын ситиһиэхтээхпит.
Икки күн устата сэргэх, кэскиллээх кэпсэтии, санаа атастаһыыта тахсыаҕа, ол түмүгүнэн быһаарыы ылыллан үлэҕэ салгыы турунуохпут. Бу тэрээһини биһиги улууска ыытарга быһаарыыны ылбыт миниистирдэрбитигэр Нюргуна Афанасьевнаҕа уонна Артем Александровичка махталбын тиэрдэбин, — диэн Мэҥэ Хаҥалас улууһун баһылыга Дмитрий Тихонов санаатын үллэһиннэ.