Тыа сиригэр үлэлии барар педагогтары өйөөһүҥҥэ 100 мөл. солк. итэҕэһэ суох үп көрүллүөҕэ

Ил Дархан Айсен Николаев бүгүн үөрэх үлэһиттэрин атырдьах ыйынааҕы тэрээһиннэрин иитинэн сүрүн мунньахха кытынна, соруктары туруорда. Олортон биирдэстэринэн педагогическай үлэһиттэр туруктарын мэктиэлиир сокуон олоххо киириитин өйөөһүҥҥэ 100 мөл. солк. көрүллүүтүн эттэ.

“Педагог идэтин үрдүктүк тутар инниттэн бу сыл от ыйыгар педагогическай үлэһиттэр туруктарын мэктиэлиир туһунан өрөспүүбүлүкэ сокуона ылыллан турар. Сокуонунан аан бастаан үлэлээн саҕалыыр эдэр педагогтар, ону тэҥэ, тыа сиригэр үлэлии барар педагогтары өйүүр миэрэлэр көрүллүбүттэрэ. Сокуон 2026 сыл тохсунньу 1 күнүттэн үлэлиэхтээх, өрөспүүбүүлүкэ Бырабыыталыстыбатыгар  эһиил бу миэрэлэр олоххо киирэллэригэр анаан 100 мөл. солк. итэҕэһэ суох үбү көрөргө” – диэн Ил Дархан эттэ.