Тыа сирин доруобуйатын харыстабылыгар болҕомто уҕараабат

Ааспыт сылга Саха сиригэр 15 биэлсэр-акушер пууна тутулунна. Быраас амбулаториялара Хатыстыыр (Алдан улууһа), Арыылаах, Чыаппара (Чурапчы), Саһыр (Муома) уонна Кэптин (Горнай) сэлиэнньэлэригэр баар буоллулар.

Бүлүү, Үөһээ Дьааҥы, Үөһээ Бүлүү, Эдьигээн, Кэбээйи, Мэҥэ Хаҥалас, Сунтаар, Таатта, Томпо, Уус Алдан улуустарыгар биэлсэр-акушер пууннара үлэҕэ киирдилэр.
2012 сылтан Саха сиригэр «Тыа сирин дуоктара» уонна «Тыа сирин биэлсэрэ» бырагырааманан 1300 исписэлиис тыа сиригэр уонна куораттарга үлэлиир.
Онтон 2023 сылга Саха сирин мэдиссиинэтин тэрилтэлэригэр ити бырагырааманан 166 исписэлиис үлэлээтэ. Кинилэртэн 117-тэ – быраас, 49-һа – биэлсэр.
Ону таһынан дойду бэрэсидьиэнэ Владимир Путин сорудаҕынан мэдиссиинэ саҥа эбийиэктэрин тутар уонна балыыһалар материальнай-тиэхиньиичэскэй базаларын тупсарар туһугар быйыл доруобуйа харыстабылын бастакы сүһүөх тэрилтэлэрин модернизациялааһын (ордук тыа сиригэр) салҕаныаҕа.