Тыа сирин оскуолаларыгар болҕомто ууруллар

РФ бэрэсидьиэнэ Владимир Путин бэҕэһээ, тохсунньу 9 күнүгэр, үөрэх миниистирин Сергей Кравцову кытары көрүстэ. Миниистир кэлиҥҥи сылларга тыа сирин оскуолаларыгар ордук болҕомто ууруллубутун бэлиэтээтэ.

Миниистир иһитиннэрбитинэн, национальнай бырагыраамаларынан билигин дойду үрдүнэн барыта 900 саҥа оскуола тутулунна. Ону таһынан кэлиҥҥи сылларга оскуолаларга өрөмүөн үлэтэ күүскэ барда. Оҕо саадынан хааччыллыы дойду үрдүнэн 99 % буолбут. Санатан эттэххэ, аҕыйах сыллааҕыта бу көрдөрүү 80 % этэ. Кэпсэтии кэмигэр Сергей Кравцов кэлиҥҥи сылларга тыа сирин оскуолаларыгар улахан болҕомто ууруллубутун бэлиэтээтэ.

— Билигин улахан болҕомтобутун тыа сирин оскуолаларыгар ууран олоробут. Хапытаалынай өрөмүөн бырагырааматыгар киирбит оскуолалартан тыа сирин үөрэҕин кыһалара 70 бырыһыанын ылаллар. Хапытаалынай өрөмүөнү таһынан оскуолаларга саҥа оборудованиелар атыылаһыллаллар, — диэн этэр Сергей Сергеевич.

Үөрэхтээһин национальнай бырагырааматынан Арассыыйа оскуолаларыгар кванториумнар аһыллан үлэлииллэр. Билигин 300-тэн тахса кванториум, 13 тыһыынча “Точка роста” эбии үөрэхтээһин кииннэрэ аһыллыбыттара.

— Бу эбии үөрэхтээһин кииннэрэ физиканы, биологияны, химияны ордук дириҥэтэн үөрэтэллэр. Оҕолор бэйэлэрэ да бу кииннэри сөбүлээтилэр, уруоктарын кэнниттэн интэриэһиргээн дьарыктаналлар, — диэн бэлиэтиир миниистир.

Сергей Кравцов орто анал үөрэхтээһин туһунан этэригэр, үөрэнээччилэр 65 бырыһыаннара билигин тохсус кылаас кэнниттэн колледжтарга баран үөрэнэллэрин бэлиэтээтэ.

— Оскуола үөрэнээччилэрэ тохсус кылаас кэнниттэн орто үөрэхтэргэ киирэллэрэ сылтан сыл элбии турар. Билигин үс тыһыынчаттан тахса аныгылыы оҥоһуллубут мастарыскыайдары үлэлэтэ турабыт. “Профессионалитет” диэн анал бырагырааманан маастардары үөрэтэр киини тэрийии бара турар. 2024 сылга бу киини толору үлэлэтэн барыахтаахпыт, — диэн этэр кини.

Түмүккэ Сергей Кравцов Арассыыйа састаабыгар киирбит түөрт саҥа эрэгийиэннэр үөрэхтэрин систиэмэтин саҥардыыга үлэлэһии барыахтааҕын эттэ.