Тыа сирин оскуолаларыгар физикаҕа, химияҕа уонна биологияҕа — тэйиччиттэн үөрэтии

Быйылгыттан Саха сиригэр “Ситимнээх учуутал” саҥа пилотнай бырайыак  чэрчитинэн үс улууска тэйиччиттэн үөрэтии ыытыллыаҕа.

СӨ үөрэх уонна наука миниистирэ Нюргуна Соколова иһитиннэрбитинэн, саҥа үөрэх дьылыгар Сунтаар, Уус Алдан уонна Өлүөхүмэ улуустарын 15 оскуолатыгар “Ситимнээх учуутал” бырайыак олоххо киириэҕэ. Бу сонун саҕалааһын 7-9 кылаас үөрэнээччилэригэр физикаҕа, химияҕа уонна биологияҕа анал идэлээх учууталлар тиийбэттэрин быһаарарга туһуланар. Бырайыак чэрчитинэн үөрэнээччилэргэ онлайн-уруоктар, электроннай учебниктар, видеоматырыйааллар уонна аудио-уруоктар ыытыллыахтара.

Ил Дархан уонна Бырабыыталыстыба пресс-сулууспата иһитиннэрбитинэн, пленарнай мунньахха Ил Дархан Айсен Николаев бу бырайыагы эһиилигиттэн аҕыйах оҕолоох тыа сирин оскуолаларыгар олоххо киллэрэргэ сорудахтаата.