Тыа сирин саамай улахан оскуолатын үрдүнээҕи ис бүрүөһүнэ суулунна

Бүгүн, сэтинньи 15 күнүгэр,  Горнай улууһун Семен Данилов аатынан Бэрдьигэстээх орто оскуолатын үрдүнээҕи ис бүрүөһүнэ сууллубутун туһунан иһитиннэрии кэллэ. Дьолго, ким даҕаны эмсэҕэлээбэтэх.

СӨ Үөрэҕин уонна билимин министиэристибэтэ: “С.П. Данилов аатынан Бэрдьигэстээх орто оскуолатын үрдүн иһинээҕи бүрүөһүнэ суулунна. Эмсэҕэлээччи суох, муниципальнай хамыыһыйа баран көрдө-иһиттэ. Туохтан сууллубут төрүөтэ быһаарылынна – иһинээҕи туттарыыта дьиэктээх эбит (скрытый дефект крепления). Бэдэрээтчит “Союз инвест” ХЭУо өрөмүөннүү сылдьар. Үөрэх эрэсиим быһыытынан бара турар” – диэн иһитиннэрэр.

Санатан эттэххэ, тыа сирин саамай улахан оскуолата – Семен Данилов аатынан Бэрдьигэстээх орто оскуолата быйыл балаҕан ыйыгар аһыллыбыта.