«Тыа сирин учуутала» бырагыраамаҕа докумуону тутуу саҕаланна

Тохсунньу 10 күнүттэн «Тыа сирин учуутала» бырагырааманан 50 тыһыынчаҕа тиийэ нэһилиэнньэлээх сэлиэнньэлэргэ, оробуочай бөһүөлэктэргэ үлэлии барыан баҕалаах дьонтон докумуоннары тутуу саҕаламмыта. Учууталга төлөбүр 2 мөл. солк. тэҥнэһэр.

«2024 сылга бу бырагырааманан араас оскуолаларга баар 17 вакансияны сабар былааннаахпыт», — диэн үөрэҕирии уонна наука миниистирэ Нюргуна Соколова иһитиннэрэр.

Сүүмэрдиир түһүмэххэ сайаапкалары бу сыл муус устар 24 күнүгэр диэри «Земский учитель» федеральнай портал нөҥүө туталлар: https://zemteacher.apkpro.ru/ (Банк вакансий – выбрать регион – подать заявку).

«Тыа сирин учуутала» кыттыылаахтара бу бырагыраама олорор дьиэ-уот боппуруоһун быһаарарга улахан судаарыстыбаннай көмө буоларын этэллэр.

«Саҥа усулуобуйаҕа олохсуйарбар оскуолам дьаһалтата көмөлөспүтэ. Дириэктэрбит куруук өйүүр. Саҥа дьыллааҕы бырааһынньыктар кэннилэриттэн бөһүөлэкпэр төннүбүтүм уонна номнуо Сахам сирин ахтыбыт эбиппин диэн өйдөөбүтүм. Бу бырагыраамаҕа кыттыы олорор дьиэ-уот кыһалҕатын быһаарарга судаарыстыба өттүттэн көмөнөн буолар», — диэн Ирина Тыжинова кэпсиир. Кини Нерюнгри  оройуонун Серебряный Бор бөһүөлэгэр Бурятияттан кэлэн математика уонна информатика учууталынан үлэлиир.