Тыа сирин ыччата чуҥкуйбат

Арассыыйатааҕы ыччат сойууһа тэрийбит нэһилиэк креативнай эйгэлэрин икки ардыларынааҕы #АРТвСело күрэс  түмүгүнэн Горнайдааҕы кииннэммит библиотечнай ситим кыайыылаахтар ахсааннарыгар киирбитэ.

Куонкурус РФ бэрэсидьиэнин култуурунай көҕүлээһиннэрин пуондатын өйөбүлүнэн ыытыллыбыта. Уопсайа 26 эрэгийиэнтэн 70 сайаапка киирбититтэн, өрөспүүбүлүкэттэн соҕотох кыайыылаах аатын ылан, үөрүүбүт муҥура суох.

Ол курдук, күрэс кыайыылаахтара айарга-тутарга, креативнай эйгэни тэрийэргэ туһааннаах маллары бэлэх тутан, нэһилиэк оҕолоругар, эдэр ыччатыгар араас хабааннаах тэрээһиннэри тэрийэллэр.

П.Д.Аввакумов аатынан киин бибилэтиэкэ үлэһиттэрэ «АРТвСело» бырайыак чэрчитинэн, Бэрдьигэстээх нэһилиэгин оҕолоругар уонна эдэр ыччатыгар кэрэҕэ угуйар маастар-кылаастары ыыталлар. Маастар-кылаастарга мас оҥоһуктары быһа сиэтии ньыматынан киэргэтэргэ, акрил кыраасканан эко-суумкаҕа уруһуй түһэрэргэ, пластилинынан ону-маны оҥорорго үөрэнэллэр.

Маннык бырайыактар олоххо киирэн, тыа сирин эдэр ыччатын, оскуола үөрэнээччилэрин кэрэ эйгэтигэр угуйаллар. Иллэҥ кэмнэрин туһалаахтык атааралларыгар, сэргэхсийэллэригэр күүс-көмө буолаллар.

Марина Дашинимаева,

Бэрдьигэстээх, Горнай.

Мария Павлова хаартыскаларга түһэриитэ.