Тыаҕа 70 саастаах тэллэйдьит сүппүт

112 суһал көмө нүөмэригэр 70 саастаах эр киһи сүппүтүн туһунан иһитиннэрии киирбит.

Саха сиринээҕи Быыһыыр сулууспатын пресс-сулууспата иһитиннэрэринэн, Саха сирин икки олохтооҕо тэллэйдии барбыттар, ол эрээри биирдэстэрэ болдьоммут кэмҥэ массыынатыгар төннүбэтэх.

Доҕоро суоҕун билэн, аргыһа долгуйан, көмө көрдөөбүт. Дьокуускайдааҕы көрдүүр-быыһыыр этэрээт быыһааччылара түөрт киһилээх састаабынан аҕа саастаах тэллэйдьити көрдүү тахсыбыттар. Ол эрээри, соторунан көрдүүр үлэ тохтотуллубут: муммут киһи бэйэтэ тыаттан тахсан, суолун булбут уонна  биллэрбит.

Быыһааччылар Саха сирин бары олохтоохторун тыаҕа сэрэхтээх буолуу быраабылаларын тутуһалларын санаталлар. Мэлдьи толору иитиллибит суотабай төлөпүөнү уонна эбии аккумуляторы илдьэ сылдьарга, бэйэ-бэйэни болҕойон көрүнэргэ уонна аргыстары харах далыттан сүтэрбэккэ сылдьарга сүбэлииллэр.

Ыксаллаах быһыыга-майгыга түбэстэххэ, суһал сулууспалар биир кэлим 112 нүөмэрдэригэр эбэтэр быыһыыр сулууспа дьуһуурунайын 45-90-19 төлөпүөнүгэр эрийиэххэ наада.