Тыалга боруота арыллан массыынаны алдьаппытынан хоромньу ирдэннэ

2024 сыл балаҕан ыйын 6 күнүгэр ирдэһээччи бэйэтин «TOYOTA LAND CRUISER PRADO» массыынатынан Дьокуускай куорат Котенко уулуссанан айаннаан испит. Бу туһунан СӨ Үрдүкү суутун пресс-сулууспата иһитиннэрэр.

Хаҥас диэки эргийэн истэҕинэ, күүстээх тыалтан «ЭКСПО-14» ХЭУо  бас билиитигэр баар сир учаастагын күрүөтүн боруотата аһыллан кэлэн, массыынаны охсубут. Түмүгэр дьахтар көлөтө алдьаммыт.

Эспэртииһэ түмүгүнэн, чөлүгэр түһэрэр өрөмүөн сыаната 70 588 солк. буолбут. 2024 сыл алтынньы 15 күнүгэр дьахтар сир учаастагын бас билээччитигэр электроннай аадырыһынан хоромньуну толуйтарар туһунан ирдэбил сурук ыыппыт, ол эрээри эппиэттээччи ирдэбили толорбокко хаалларбыт.

Суут мунньаҕар эппиэттээччи «ЭКСПО-14» ХЭУо бэрэстэбиитэллэрэ ирдэбили сөбүлэспэккэ, ону толорбокко хаалларарга көрдөспүттэр. Дьокуускайдааҕы куорат суутун быһаарыытынан ирдэбил сорҕото толоруллубут. Суут «ЭКСПО-14» ХЭУо-тан 70 588 солк. хоромньуну, 30 000 солк. бэрэстэбиитэл ороскуотун, 4 500 солк. сыаналааһын ороскуотун уонна 4 000 солк. судаарыстыбаннай пошлинаны төлөтөргө уураахтаабыт. Хампаанньа суут быһаарыытын сөбүлэспэккэ, СӨ Үрдүкү суутугар апелляция үҥсүүтүн киллэрэн, бастакы инстанция суутун быһаарыытын көтүрэргэ көрдөспүт. СӨ Үрдүкү суутун Гражданскай дьыалаларга кэллиэгийэтэ дьыала матырыйаалларын көрөн, бастакы инстанция быһаарыытын көтүрэргэ эбэтэр уларытарга төрүөт булбата, онон быһаарыыны уларыппакка хаалларда. Уураах сокуоннай күүһүгэр киирдэ.