«Тыа сирин доктора» бырагыраама кээмэйин улаатыннарыы доруобуйа харыстабылын сайдыытын улаханнык көҕүлүөҕэ

Арассыыйа саҥа эрэгийиэннэригэр «Тыа сирин доктора»  бырагыраамаҕа бэриллэр үбү: быраастарга 2 мөл. солк., биэлсэрдэргэ 1 мөл. солк. диэри улаатыннарыахтара.
Бу туһунан РФ Бэрэсидьиэнэ Владимир Путин бүгүн быһа эпииргэ иһитиннэрдэ.

Мииринэй Киин балыыһатын кылаабынай бырааһа Вера Тарасова В.Путин бу этиитин истэн баран, ити дойду саҥа эрэгийиэннэригэр доруобуйа харыстабыла сайдыытын улаханнык көҕүлүөҕэ диэн санаатын үллэһиннэ.
«2023 сылга биһиги балыыһабыт кэлэктиибэ 14 эдэр бырааһынан күүһүрдэ, бу сыл устата барыта 34 исписэлиис биһиэхэ үлэҕэ киирдэ. Каадырдар маннык кэлэллэригэр «Доруобуйа харыстабыла» национальнай бырайыак чэрчитинэн «Тыа сирин доктора» уонна да атын бырагыраамалар олоххо киириилэрэ көмөлөстө«, — диэн Вера Тарасова эттэ.

«Доруобуйа харыстабыла» национальнай бырайыак сыала-соруга -– олорор сиргинэн чугас мэдиссиинэ көмөтүн оҥоруу уонна табыгастаах буоларын үрдэтии. Национальнай бырайыак 2019 сылтан олоххо киириэҕиттэн олус элбэх эбийиэк, ол иһигэр өрөспүүбүлүкэтээҕи Перинатальнай уонна Сүрэх-тымыр кииннэрэ, улуустааҕы икки балыыһа, быраас 65 амбулаторията уонна биэлсэр-акушер пууна үлэҕэ киирдэ. Ону таһынан 229 массыына, ол иһигэр 16 көһө сылдьар мобильнай комплекс, 663 мэдиссиинэ араас тэрилэ атыылаһылынна.

(СӨ Ил Дарханын уонна бырабыыталыстыбатын пресс-сулууспата)