Тыатааҕы барытын истэ сылдьар, дииллэрэ кырдьаҕастар

Бэҕэһээ социальнай ситимнэргэ Кэбээйигэ отоннуу сылдьар үс дьахтарга алта эһэ саба түспүт, биир дьахтары атаҕын эрэ хаалларбыттар диэн дьулааннаах сурах тилийэ көппүтэ.

Оннооҕор өрөспүүбүлүкэбит биллэр-көстөр, ытыктанар дьоннорун “өлөрөр” социальнай ситими  бу да сырыыга итэҕэйбиттэрэ бэрдэ эбитэ дуу эбэтэр киһи аньыырҕаан да, ыытыа суох сонунун көр-күлүү оҥостон ыытыспыттара эбитэ дуу. Эмиэ өрөспүүбүлүкэни саба сүүрэн кэбиспитэ.

Сурах оруннааҕын дуу, суоҕун дуу билээри, Кэбээйитээҕи судаарыстыбаннай экология инспекциятын ыстаарсай инспектора Елена Беленковаттан ыйытастыбыт. Кини социальнай ситиминэн маннык сурах кэлээтин кытта, нэһилиэктэр дьаһалталарыгар эрийэн ыйыталаспыттарын, сымыйа сурах буоларын бигэргэттэ. Онон итирик туруктаах дьон «шуткалаабыттар» диэн буолбут. Итинник хас аһааһын кэнниттэн буолар-буолбат сонуннары социальнай ситиминэн ыыта-ыыта алларастаһар, дьону да уолутар, тустаах үлэлээх дьону да аралдьытар көкөттөрү булан дьүүлгэ тардыахха наада.

Урут кырдьаҕас дьон, эн тугу саҥараргын тыатааҕы барытын истэ сылдьар дииллэрэ.