Тыатааҕы чалбахха дуоһуйа сөтүөлээтэ, муннунан хабахтары таһаара оонньоото (ВИДЕО)

Бары да кыратык оҕо курдук буолан ылар буоллахпыт.

Көрүҥ эрэ, бу «Өлүөнэ очуостара» национальнай пааркаҕа анаан туруоруллубут фотоловушкаҕа чалбахха сыыла сылдьан муннунан хабахтары таһаара оонньуур эһэ уһуллубут.

Кини эмиэ кыратык мэниктээн ылар буоллаҕа. Видеоны киһи эрэ манньыйа көрөр (көһүтүллүбэтэх өртүттэн соһуччу видео!). Бу ыам ыйын бүтүүтүгэр «Морсо» родовой общинаттан ырааҕа суох сиргэ уһуллубут. Санаан кэбиһиҥ: аарыма тыатааҕы кыра чалбаҕы көрөн баран онно астына оонньуурун! Сөрүүкээри буолуо дуу? Дьоруойбут салгыы оонньуур: кыра оҕочоон курдук, чалбаҕар умсугуйан туран, кыһалла-кыһалла сыылар уонна муннунан хабахтары таһаара оонньуур! Арааһа, уу уратытык уоскутар буолуон сөп.

Салгыы астына-дуоһуйа көрүлээбит тайҕабыт хаһаайына бассейҥҥа сөтүөлээн тахсыбыт курдук, абытайдык илгистэн дьигиһитэр. Дьэ, уонна астыммыттыы туттан фотоловушкаҕа утары кэлэр. Бэл, объектив диэки көрөр, хайдах эрэ санааҕа: «Хайа, хайдахпыный?» диэбит курдук.

Видео учаастактааҕы судаарыстыбаннай иниспиэктэр Василий Калитин тиксэриитэ.

#ленскиестолбы

@lenapillarsnationalpark