“Тыатааҕылар бөһүөлэк таһыгар чугаһаатылар”

Быйыл Томпо  оройуонун Кириэс Халдьаайы бөһүөлэгин эргин тыатааҕы элбээтэ дииллэр.  Уонча хонуктааҕыта пиэрмэҕэ  кырдьаҕас таарыйбытын туһунан иһитиннэрэн турабыт.

— Кырдьык, бөһүөлэк таһыгар наһаа чугаһаатылар. Уонча хонуктааҕыта Ынахсыкка ынах ыы сырыттахтарына биир кырдьаҕас киирэ сылдьыбыт этэ. Түөрт-биэс хонуктааҕыта Биэрэккэ көрбүттэрэ. Оттон бэҕэһээ Ударникка икки тыатааҕы  сүөһүлэри батыһан быһыылаах, арыы сыаҕын таһыгар кэлбиттэрин туһунан этэллэр. Сопхуос саҕаттан кадровай булчут быһыытынан эттэхпинэ, наһаа бултаммат буолан, элбээн эрэр курдуктар. Бултаһар да киһи суох. Ону тэҥэ дьон дьалаҕайа эмиэ биричиинэ буолар дии саныыбын. Урут “скотомогильниктар” баар буолар этилэр, билигин ханна даҕаны көнньүнэн өлбүт сүөһүнү эҥин таах онно-манна состорор буоллулар. Тыа сирин олохтоохторо ону тутуһуохтарын наада, — диэтэ Кириэс Халдьаайы олохтооҕо Василий Матаркин.