Тыатааҕыны бултаһарга күүскэ ылсыахтара

Былырыын, быйыл тыатааҕылар нэһилиэнньэлээх пууннарга аһары чугаһаабыт, дьоҥҥо саба түһүүлэриттэн эчэйиилэр, өлүүлээх да түгэннэр тахсыталаатылар. 

Бу 2025 сылга СӨ Экологияҕа министиэристибэтэ уопсайа 316 лиссиэнсийэни 558 тыатааҕыны бултаһарга биэрбит. Маннык быһаарыныыны нэһилиэктэр баһылыктарын уонна сир баайын хостуур баахтабай миэтэдинэн үлэлиир тэрилтэлэр көрдөһүүлэринэн ылыллыбыт.

Адьырҕалар элбээһиннэрэ дьон-сэргэ олоҕор быһаччы кутталынан суоһуура бигэргэнэн, тыатааҕыны бултаһыыга үлэ ыытыллыан наадата билиннэ. Бүгүҥҥү күҥҥэ 144 тыатааҕы бултанна. Адьырҕа ахсаанын аччатыыга булт сезона ый устата барыаҕа. Маннык бултааһыҥҥа көҥүлү босхо биэрэллэр.

Биэдэмэстибэҕэ иһитиннэрбиттэринэн, сир аһын кэмигэр тыатааҕыны көрсүү элбиэн сөп. Онон көмүскэллээх буолууну хааччыныы туһунан эппиттэр.  Көмүскэл быһыытынан биэрэстээх ыстарар тэриллэр, фальшфеердэр, тыастаах-уустаах тэриллэр буолаллар. Маны таһынан бэйэни көмүскэнэргэ сааны туһаныахха сөбүн бэлиэтииллэр. Ол эрээри саалаах сылдьыы көҥүллээх уонна булт сезонун кэмигэр эрэ буоларын умнумаҥ.