Тыатааҕыны соһуччу көрүстэххэ…

Айылҕаҕа, тыаҕа сырыттахха олоххо киһи үөйбэтэх өттө ардыгар буолуон сөп. Мантан сайын сир аһын кэмигэр тыатааҕы элбээбитинэн, киһи  соһуччу көрсүөн сөп.

“Кыымаан” булчуттар түмсүүлэрин салайааччыта Александр Тастыгин тыатааҕыны соһуччу көрүстэххэ хайдах буолар, тугу гынар туһунан сүбэлиир:

— Саха сирин олохтоохторо, арай тыатааҕыны соһуччу көрсө түһэр түгэҥҥитигэр бэйэ бодоҕутун тардынар наада. Ол курдук, ханнык да түгэҥҥэ куотар сатаммат. Улахан тыаһы таһааран, иһити-хомуоһу тыаһатан, хаһыытаан-ыһыытаан куттуохха наада.  Куотар буоллуҥ да, мин сиэхпин сөп диэн иэдээни оҥоруон сөп. Кини көрдөххө эрэ мөдөөт курдук. Ис дьиҥэр, олус сыыдам, маска хатаастар, эккирэтиэн баҕардаҕына тугу баҕарар ситэр кыыл. Кини иссэр бириэмэтигэр билигин оҕолорун арааран куотар кэмэ. Ол иһин биир-икки саастаах эһэлэр ийэлэриттэн туспа сылдьаллар. Сэрэхтэрин сүтэрэн тугу барытын билэ сатааннар киниттэн куотары эккирэтэр, дьонтон куттаммат буолаллар. Онон кыра саастаах тыатааҕыттан ордук куттаныахха наада. Улахан,  саастаах эһэ өйүн туппут буолар. Иссэн бүттэҕинэ киһиэхэ улаханнык чугаһаабат. Эдэр эһэлэр ыт курдук киһини эккирэтэр буоланнар, киһиэхэ саба түһүөхтэрин, киһини эчэтиэхтэрин сөп. Тыатааҕылар иссэр кэмнэригэр тыһы эһэ куотар, атыыра эккирэтэр. Барыҥныырга барытыгар саба түһүөхтэрин сөп. Онон бу ордук сэрэхтээх кэмҥэ мантан сайын тыатааҕыны элбэхтэ көрсүөххэ сөп.