Түбэ нэһилиэгин көхтөөх түөлбэлэрэ
11.02.2025, 18:30
Хаартыска: “Нам улууһа” МТ пресс-сулууспата
Бөлөххө киир:
Нам улууһугар түөлбэнэн үлэ нэһилиэктэри сайыннарар. Түбэ нэһилиэгэр күн бүгүн үс түөлбэ үлэлиир-хамсыыр.
Хас биирдии түөлбэ олоҕо-дьаһаҕа тупсара, үлэтэ-хамнаһа тахсыылаах буолара олохтоохтор көхтөөх сыһыаннарыттан тутулуктаах. «Кытыл» түөлбэни Татьяна Никонова 10-с сылын ис дууһатыттан салайар, үгүс сыраны эрэйэр уопсастыбаннай үлэни эппиэтинэстээхтик сүгэр. Түбэҕэ түөлбэлэр олохтоох дьаһалтаны кытта биир сүбэнэн үлэлииллэр. Кинилэр араас куонкурустарга, күрэхтэргэ ситиһиилээхтик кытталлар. «Кытыл» түөлбэ улуустааҕы тыа сирдэрин тупсарыы куонкуруһугар ситиһиилээхтик кыттан 2022 сыллаахха 100 тыһ. солк. сертификатынан наҕараадаламмыта.
Бу үптэригэр оҕо былаһааккатыгар хачыал уонна горка ылан туруорбуттара. Манна билигин оҕолор тоҕуоруһа мустан саамай сөбүлээн оонньуур сирдэрэ. Бу курдук ким эмит оҥорон биэрэрин күүппэккэ, сөпкө дьаһаннахха үпкэ-харчыга тиксэн, дьоҥҥо-сэргэҕэ туһалаах үлэлэр барыахтарын сөбүн түөлбэ дьоно бэйэлэрин холобурдарыгар көрдөрөллөр.
“Кытыл” түөлбэ ыытар үлэтэ сыл ахсын инники кирбиигэ сылдьар. Биир улахан туруорсууларынан оскуола-оҕо саадын туттарыы буолар. Уһун кэмнээх туруорсуу кэнниттэн, тутуу 2024 сылтан саҕаланан эһиил түмүктэниэхтээх. Ааспыт күһүн түөлбэ салайааччыта Татьяна Никонова бэйэтинэн тутуу үлэһиттэригэр астарын астаан үгүс махталы ылбыта.
Түөлбэ үлэтигэр Альберт Анатольевич Никонов, Галина Кирилловна Куличкина, Уруйдаах Айтыына Дьол кыыһа, Александра Григорьевна Федорова, Константин Константинович уонна Александра Григорьевна Федоровтар, Каролина Попова курдук көхтөөх олохтоохтор көмөлөһөллөр. Ону сэргэ түөлбэҕэ сыһыарыллыбыт нэһилиэк депутата Федоров Аркадий Егорович өйөбүл буолар. Кытыллар нэһилиэк спартакиадатыгар, араас куонкурустарга, күрэхтэргэ, өй оонньууларыгар өрүү бириистээх миэстэҕэ тиксэллэр. Субуотунньуктарга тахсан өрүс кытылын ыраастаан тупсарыы үлэтин ыыталлар.
Бу күннэргэ Кыайыы 80 сылынан олбохтору тигии саҕаланна. Маннык түөлбэлэр холбоһуктаах тэрээһиннэрэ олохтоохтору сомоҕолууллар, уопсастыбаннай үлэҕэ көҕүлүүр суолталаахтар.
“Нам улууһа” МТ пресс-сулууспата
+1
3
+1
+1
+1
+1
+1
+1
Сообщить об опечатке
Текст, который будет отправлен нашим редакторам: