Түөһэйиини «Биир түннүккэ» быһаарыахтара

3-с №-дээх Өрөспүүбүлүкэтээҕи килиньиичэскэй балыыһа иһинэн үлэлиир «Кабинет памяти» саҥа бырайыагы үлэлэтэн саҕалаата. «Биир түннүк» бырагырааманан өй, мэйии үлэтэ мөлтөөһүнүн, түөһэйии боппуруостарынан исписэлиистэр дьону босхо көрүөхтэрэ-истиэхтэрэ.

Саха сирин олохтоохторо биир кэлим көмөнү ылыахтара: неврологка, психиатрга, мэдиссиинэ психологар көрдөрүнэн, диагноз туруортарар кыахтаналлар.

Эрдэттэн суруйтаран баран, кулун тутар 24, муус устар 25, ыам ыйын 30 күннэригэр диагностиканы ааһыахтарын сөп. Кэрэхсэбиллээҕэ диэн, илэ кэлэн эрэ буолбакка, тэйиччиттэн, онлайн көрүҥүнэн эмиэ көрдөрүнүөххэ сөп.

Онон ыраах сытар улуустар олохтоохторо ханна да айанныы сатаабакка, дьиэлэриттэн олорон, үрдүк кылаастаах исписэлиистэргэ көрдөрүнэр кыахтаналлар. Бу ордук кырдьаҕас, кыаммат дьоҥҥо табыгастаах. Айанныы, балыыһаларынан сылдьа сатаабакка, уһун уочаракка олорбокко, кэтэспэккэ-манаспакка, тута хас да наадалаах исписэлиискэ көрдөрүнэллэр.

Кырдьаҕас төрөппүттэргитин, эбэлэргитин-эһэлэргитин көрдөрөргө тиэтэйиҥ. Сааһырбыт дьоҥҥо өй, мэйии үлэтин кэһиллиитэ, умнуган буолуу, түөһэйии элбэх. Ону ыраатыннарбакка, эрдэттэн көрдөрүнэр, бырааска, психологка быһаартарар, эмтэнэр доруобуйаҕа улахан оруолаах.

Эрдэттэн суруйтарыы нүөмэрэ — 8914-247-44-01.

«Кабинет памяти» үлэтин-хамнаһын туһунан бу сигэнэн киирэн ааҕыҥ:

Өйү-мэйиини үлэлэттэххэ – түөһэйии суоһаабат