Түөкүннээһин саҥа схемата

Түөкүттэр биэнсийэлээх эмээхсини “тилиннэрбиттэр” уонна счетуттан туох баар харчытын устан ылбыттар.

Түөкүттэр өлбүт дьон сим-каарталарын хаттаан таһааран, кинилэр счеттарыттан харчыны устары саҕалаатылар диэн Mash Telegram ханаала иһитиннэрэр. Ол курдук, Москва уобалаһын олохтооҕо эбээтэ  өлбүтүн кэннэ, хара санаалаахтар нэһилиэстибэ дьыалаларын испииһэгиттэн кини дааннайдарын билбиттэр уонна өлбүт биэнсийэлээх киһи аатыгар SIM-каартаны оҥорон баран, счетуттан 1,2 мөл солк. устан ылбыттар.

Сиэнэ ону билэн, бэлииссийэҕэ үҥсүбүт.

Ол түмүгэр уорбаланааччылар тутуллубуттар. Кинилэр Красноярскай кыраайтан төрүттээх 20–22 саастаах үс эдэр дьон эбиттэр, 20 саастаах Брянскай олохтооҕо, 29 саастаах Йошкар-Ола олохтооҕо уонна тэрийээччи Саратов куорат 44 саастаах олохтооҕо буолан тахсыбыттара. Бу чахчынан холуобунай дьыала тэрилиннэ.

Бу иннинэ Арассыыйа Баана түөкүттэр уорбут харчыларын кумааҕы харчыга кубулутарга көмөлөһөр дьону дроппердар диэн быһаарбыта. Кинилэр үс көрүҥҥэ арахсаллар: толорооччу, транзиттааччы уонна кумааҕы харчыга таһаарааччы. Транзиттааччы каартатыгар харчы түстэҕинэ, салгыы реквизиттэргэ көһөрөр, “заливщик” курьердартан харчыны ылан банкомат нөҥүө “угар”, оттон кумааҕы харчыга таһаарааччы каартаҕа түспүт харчыны банкоматтартан устар.

* * *

Түөкүттэр бииртэн биир харчыны уорар ньымалары толкуйдууллар.

Эмсэҕэлээбит киһи төлөпүөнүгэр биллибэт нүөмэргэ эрий диэн сурук кэлэр. Эрийдэҕинэ, түөкүн ыдан, бэйэтин суотабай сибээс эпэрээтэригэр инженер быһыытынан билиһиннэрэр. Кэпсэтии кэмигэр, кини сыыппаралар уонна бэлиэлэр холбоһуктарын (#90, #09, уонна да атын) киллэрэргэ  көрдөһөр. Бу түөкүттэр дьон дааннайдарын уорар саҥа ньымалара.

«Ханнык да түгэҥҥэ маны оҥоруо суохтааххыт», — диэн ИДьМ сэрэттэ.

Атаакалааччы көрдөһүүтүн толордоххуна, кини «эн сим-каартаҕар киирэр кыахтанар уонна эн суоккар төһө баҕарар эрийиэн сөп».

Баан счеттара эмиэ кутталлаахтар.