Түөкүннээн дьон харчытын уоруу элбээтэ

Ааспыт сууккаҕа өрөспүүбүлүкэ иһигэр буруйу оҥоруу 9 түгэнэ бэлиэтэннэ диэн СӨ Борокуратуурата иһитиннэрэр.

Дьокуускай уонна Нерюнгри куораттарыгар түөкүннээһин тахсыбытын чахчыта билиннэ, 3,9 мөл. солк. тахса суумалаах харчыны уорбуттар. Түөкүттэр «поликлиникаттан, «Якутскэнерго», суотабай сибээс тэрилтэлэриттэн төлөпүөннүүбүт диэн, ону таһынан харчыны элбэтэр сымыйа «уурунууга» угуйан албынныыллар.

Дьокуускай куоракка баан счетуттан 207 090 солк. харчыны уорбуттар.

Итини таһынан киин куоракка наркотигы сокуоннайа суох эргитии эйгэтигэр буруйу оҥорууну тохтоттулар.

Киһи өлүүлээх суол-тырааныспар быһылаана тахсыбыта бэлиэтэммэтэ.

Суукка иһигэр 4 итирик туруктаах киһи тырааныспары ыыта сылдьан тутулунна.