Түөкүттэр 3 мөл. тахса харчыны суйдаатылар

Ис дьыала министиэристибэтэ иһитиннэрбитинэн, ааспыт сууккаҕа  түөкүттэр Саха сирин түөрт олохтооҕуттан   уопсайа  3 100 000 солк.  суумалаах  харчыларын  уорбуттар.

Дьокуускайга полиция 1 нүөмэрдээх отделыгар   26 саастаах эр киһиттэн сайабылыанньа киирбит.  Эр киһиэхэ  «Мегафон» суотабай сибээс операторын  менеджерин аатыттан албыннаан  эрийэннэр,  дуогабары уһаттарыыга этии киллэрбиттэр . Ол түмүгэр 128 000 солк. уорбуттар.

45 саастаах Бороҕон олохтооҕо Дьокуускайга киирэ сылдьан, MirPay сыһыарыы уонна  «Сбер» банкоматынан  1 000 000 солк. тахса харчыны түөкүттэргэ ыыппыт. Киниэхэ «Энергосбыт»  үлэһитэбин диэн эрийбиттэр.

Сонуну киэҥник тарҕатар ситим үлэһитэ түөкүттэр  хабаларыгар киирэн биэрэн, 1 300 000 солк. суйдаппыт.

67 саастаах Марха олохтооҕо  спецсулууспа  сымыйа үлэһитигэр итэҕэйэн,  590 000 солк. маппыт.

Билигин туһааннаах түбэлтэлэринэн РФ Холуобунай кодексын 159 ыстатыйатынан холуобунай дьыала көбүтүлүннэ.