Түөкүттэр ааспыт нэдиэлэҕэ 5,9 мөл. солк. уордулар

Ааспыт нэдиэлэҕэ төлөпүөн түөкүттэриттэн өрөспүүбүлүкэ 12 олохтооҕо эмсэҕэлээтэ, диэн СӨ Борокуратуурата иһитиннэрэр.

Уоруллубут хоромньу уопсай суумата 5,9 мөл. солк. тиийбит.

Түөкүттэр икки урбаанньыты, икки суоппары, икки биэнсийэлээх киһини, биир үлэлээбэт киһини, устудьуону, ыскылаат сэбиэдиссэйин, учууталы, о.д.а. албыннаабыттар.

Түөкүттэр ФСБ, РФ Киин баанын, Энергосбыт, суотабай сибээс, о.д.а. тэрилтэтин аатыттан албыннаан, 7 киһиттэн 4,1 мөл. солк. тахса харчыны уорбуттар.
Оттон табаары атыылыыбыт диэн 3 киһиттэн 1,2 мөл. солк. үктэтэн ылбыттар.

Биир киһиттэн «инвестицияҕа» харчытын элбэтэбит диэн 448 000 солк., дьон социальнай ситимин алдьатан 125 000 солк. уорбуттар.

Онон борокуратуура болҕомтолоох буоларгытыгар сүбэлиир. Төлөпүөн түөкүттэриттэн сэрэниҥ!