Түөкүттэр аны «Энергосбыт үлэһиттэрэ» буолан кубулуналлар…

Аныгы үйэҕэ түөкүттэр аны “виртуальнай олоххо” көһөннөр, социальнай ситимнэр нөҥүө дьону албыннаан-көлдьүннээн үптэнэр буоллулар. Хомойуох иһин, түөкүттэр угаайыларыгар ордук саастаах дьон киирэн биэрэллэр.

Аҕыйах сыллааҕыта СМС иһитиннэрии нөҥүө дьону куттаан араас албын сураҕы ыытар эбит буоллахтарына, билигин социальнай ситимнэринэн арааһы-бары ыытар буоллулар. Ол курдук биир күн ИДьМ үлэһитэ, биитэр баан үлэһитэ буолан түөкүттэр кубулунан эрийэн, дьону араастаан албынныыр идэлэннилэр.

Билигин аны түөкүттэр “Якутскэнергосбыт” үлэһиттэрэбит,  «уот счетчиктарын туруорабыт” диэн дьоҥҥо төлөпүөннүүллэрэ  элбээтэ. Түөкүттэр саҥа албаһы буланнар, дьоҥҥо  СМС уонна Судаарыстыбаннай өҥөҕө кэлбит нүөмэрдэри этиҥ диэбэккэ, дьон сайаапканы ыытарыгар, төлөбүртэн кешбэк ыларыгар төлөпүөн сыһыарыытын хачайдыылларыгар биитэр “файлы” сүбэлииллэр.

Дьэ бу “файллар” улахан алдьатыылаах вируһу төлөпүөҥҥэ киллэрэллэр эбит. Сыһыарыыны хачайдаабыттарын, файлга баар ыйыллыбыт сигэни баттаан киирбиттэрин кэнниттэн төлөпүөн үлэлээбэт буолан хаалар. Онон, түөкүттэр дьон счетуттан харчыларын устан ылаллар.

Дьэ маннык хара санаалаах түөкүттэр хабаларыгар киирбэттэрин туһугар “Якутскэнергосбыт” үлэһиттэрэ маннык  иһитиннэрэллэр:

— хампаанньа үлэһиттэрэ хаһан даҕаны социальнай ситиминэн  сибээскэ тахсыбаттар, ону ааһан  төлөпүөннээбэттэр.

— дьон төлөпүөнүгэр туох даҕаны ыйынньыгы тарҕаппаттар, сигэни ыыппаттар  итиэннэ сыһыарыыны хачайдааҥ диэн сүбэлээбэттэр.

Манна биири өйдүөххэ наада, мунаарар түгэҥҥэ, хампаанньа килийиэннэри кытары офистарыгар бэйэҕит тиийэн быһаарсар ордук.

ДЭК мобильнай соҕотох сыһыарыытынан «ДЭК Якутскэнергосбыт» туһанааччы тус кэбиниэтин мобильнай версията буолар. Ону Google Play уонна App Store хачайдыахха сөп.