Түөкүттэр аны оҕолорго, үөрэххэ туттарсааччыларга тиийбиттэр

Саҥа үөрэх дьыла чугаһаан, түөкүттэр аны оскуола оҕолорун, үөрэххэ туттарсааччылары угаайыларыгар киллэрээри туруммуттар. Оҕолорго, төрөппүттэргэ үөрэх тэрилтэтиттэн төлөпүөннүүбүт диэн куоһурданан үөрэх харчытын ыытыҥ эбэтэр  СМС кэлбит коду этиҥ дииллэр эбит. Бу туһунан РГ суруйар.  

Саамай киэҥник тарҕаммыт албын ньыманан араас төрүөтүнэн үөрэххэ туттарсааччылартан харчы ыган ылыы. Бу куттал бүддьүөт суотугар да, төлөбүрдээх даҕаны миэстэлэргэ туттарсааччыларга суоһуур. Түөкүттэр үөрэххэ киирэргитигэр көмөлөһүөхпүт дииллэр эбит. Онтон үөрэххэ номнуо сүүмэрдээһини ааспыт оҕолортон үөрэх төлөбүрэ, уопсайга киирии эбэтэр докумуон толоруута диэн харчы көрдүүллэр үһү.

“Абитуриеннары буулуулларыгар саамай тарҕаммыт ньыманан төлөпүөннээччи оҕо үөрэххэ киирэригэр көмөлөһүөм диэн этиитэ буолар. Өскөтүн оскуоланы бүтэрээччи биир кэлим эксээмэнигэр кыра баалы ылбыт буоллаҕына, түөкүттэр харчы ыыттаххына “боппуруоһу суһаллык быһаарыахпыт” диэн эрэннэрэллэр. Атын түгэннэргэ абитуриеннарга “үрдүк үөрэх кыһатыттан характеристика ыларга” уонна “эбии баалы ыларга” бэлиэтэниини ааһар саайтары ыыталлар. Өссө биир ньыманан үрдүк үөрэх тэрилтэтин үлэһиттэрин аатыттан сымыйа суруктары ыыталлар” – диэн РАНХиГС эспиэрэ бэлиэтээбит.

Онон оҕолор, улахан дьон “оскуола” эбэтэр “үрдүк үөрэх” аатыттан төлөпүөннээтэхтэринэ болҕомтолоох буолуҥ, иһитиннэриини булгуччу бэрэбиэркэлээҥ диэн сүбэлииллэр.

Бу туһунан РГ суруйар. Сиһилии манна ааҕыҥ.