Түөкүттэр аны оҕолору албынныыллар

Дьокуускай куорат полициятын салаатыгар 48 саастаах эр киһиттэн үҥсүү киирбит.

Ол курдук кини 10 саастаах уолун түөкүттэр албыннан дьиэ кэргэн бүддьүөтүттэн 550-тан тахса тыһ.солк.уорбуттар. Уол интэриниэт ситимигэр телеграм-ханаал ссылкатын булбут, онно киниэхэ 4500 буонуһу «Roblox» оонньууга биэриэх буолбуттар. Уолчаан Квинка диэн блогеры кытта суруйсубут. Уолчаан бэйэтин төлөпүөнүн нүөмэрин биэрбит, онуоха Квинка бу нүөмэр сөп түбэспэтин эппит уонна ийэтин дуу, аҕатын дуу нүөмэрин ыытарыгар сорудахтаабыт. Уол ыйытыыта суох төрөппүттэрин төлөпүөннэрин ылан онно кэлэр СМС суруктары барытын хаартыскаҕа түһэрэн ыыппыт. Киэһэ төрөппүттэр счеттарыттан 557 тыһ.солк уоруллубута биллибит. Билигин түөкүттэр дьон харчытын уорар туһуттан тугу баҕарар оҥороллор, албынныыр ньымаларын уларытан иһэллэр. Биллибэт сайтарга оҕолорго оонньуулары, араас буонустары эрэннэрэллэр. Маннык албыҥҥа киирэн биэрбэт туһуттан төрөппүттэр оҕолоргутугар болҕомтолоох буолуҥ. Төлөпүөҥҥэ, интэриниэт ситимигэр тугу көрөллөрүн билэ-көрө сатааҥ,  тугу интэриэһиргииллэрин барытын учуоттуур буолуҥ диэн ИДьМ пресс-сулууспата иһитиннэрэр.