Түөкүттэр аны оҥоһуу өй көмөтүнэн сахалыы кэпсэтэ сатыыр буолбуттар

Бүгүн, бэс ыйын 11 күнүгэр, ааҕааччыбыт бэрт интэриэһинэй видеону ыытта. Истэргит курдук, түөкүттэр оҥоһуу өй көмөтүнэн аны сахалыы тылынан кэпсэтэ сатыыр буолбуттар.

Ааҕааччыбытыгар урут үлэлээбит тэрилтэтин тойоно телеграмыгар суруйан: “ФСБ үлэһитэ төлөпүөннүү сырытта дуо? Архыып докумуоннарынан ыйытыылаах үһү. Туох даҕаны докумуон эҥин сүтэ сылдьыбатаҕа дуо?” – диэбит.

Онуоха: “Суох. Ханна тиийэбин?” – диэн суруйбутун,  “бүгүн эйиэхэ бэйэтэ төлөпүөннүөҕэ, ханнык баҕарар көрүҥүнэн төлөпүөннээн тиийэрин туһугар манна звонок киириитин арый” диэбит. Тута түөкүттэр эбит дии санаан салгыы сахалыы суруйарга быһаарыммыт: “Мин бириискэҕэ сылдьабын. Манна сибээс куһаҕан, аудио кэлбэт, сообщение эрэ” – диэн хоруйдаабытын оҥоһуу өй көмөтүнэн тылбаастаан быһаараары, бэрт олуттаҕастык сахалыы саҥарда сатаабыттар.

Бу иннинэ оҥоһуу өй көмөтүнэн суруйсар албаһы туттар буолбуттарын туһунан ИДьМ сулууспата сэрэппитэ. Оттон аны билигин оҥоһуу өй технологиятын туһанан сахалыы кэпсэтиннэрэ сатыыллар эбит.

Ити курдук түөкүттэр араас көрүҥүнэн бары суруйаллар, төлөпүөннүүллэр, албастары тутталлар. Онон түөкүттэргэ киирэн биэрбэт туһугар бу курдук сүбэлиир:  Бастакытынан, ити курдук ис хоһоонноох суруктар киирдэхтэринэ сахалыы суруйа сатааҥ. Иккиһинэн, телеграмҥа суруйар дьон нүөмэрдэрэ көстөр буолбут. Онон Саха  сирин нүөмэрэ буоларын дуу, атын сиртэн суруйалларын дуу быһаарыахха сөп эбит. Үсүһүнэн, суруйар киһи нүөмэрин “заблокируйдаан” кэбиһиҥ.