Түөкүттэр аны суруналыыһы 400 тыһ.солк. албыннаабыттар

Саха сиригэр интэриниэт-таһаарыы суруналыыһа түөкүттэргэ түбэһэн, 400 000-тан тахса солкуобайын сүтэрдэ. Бу туһунан ИДьМ пресс-сулууспата иһитиннэрэр.

Биэдэмистибэ иһитиннэрбитинэн, хара санаалаахтар киэҥник тарҕаммыт албынныыр ньыманы туһаммыттар. Албыҥҥа киирбит киһиэхэ интэриниэт-маҕаһыынтан эрийэбит диэн, кэлбит баһыылка туһунан эппиттэр. Түөкүттэр куоду этэн биэрэригэр көрдөспүттэр, онтукаларын туһанан эмсэҕэлээччи тус информациятыгар киирэр кыаҕы ылбыттар. Ити кэнниттэн «Госуслуги» сервиһин оператордарынан, Росфинмониторинг уонна быраабы араҥаччылыыр уорганнар үлэһиттэринэн ааттанан эрийбиттэр. Кинилэр албыҥҥа киирбит киһи аатыгар түөкүттэр кирэдьиит оҥотторо сатыыллар диэн иһитиннэрбиттэр уонна бары үбүн-харчытын «куттала суох счеттарга» суһаллык көһөрөргө итэҕэппиттэр. Бу түгэҥҥэ СМИ бэрэстэбиитэлэ албыҥҥа киирэн, 400 тыһ. тахса солкуобайы түөкүттэр счеттарыгар бэйэтин баҕатынан ыыппыт.

Саха сиринээҕи ИДьМ сулууспата дьону-сэргэни сэрэхтээх буоларга ыҥырар уонна билбэт дьонтон киирэр төлөпүөнү, ордук тус информацияны биэрэргэ эбэтэр харчыны ыытарга көрдөстөхтөрүнэ, өйдөөн, сэрэнэн сыһыаннаһар наадатын санатар.