Түөкүттэр быйыл үрдүк үөрэҕи бүтэрбит выпускниктары бултаһан эрэллэр

Бастаан деканат аатыттан выпускникка эрийэллэр уонна дьупулуомҥар проблема баар дииллэр.

Дьупулуомҥун ылыыга туох эрэ аактаҕа илии баттаабатаххын, онон аттестационнай хамыыһыйа быһаарыыта тохтотуллар, дьупулуомуҥ дьиҥнээҕинэн ааҕыллыбат диэн биллэрэллэр. Атын дьупулуомнар дааннайдара барыта Үөрэх министиэристибэтигэр бэриллибиттэрэ, эйиэнэ эрэ хаалла диэн ыгылаталлар.

Ол кэннэ үөрэҕиҥ туһунан докумуону испииһэккэ киллэртэрэ охсууну ыраахтан да оҥоруохха сөп дииллэр. Ол туһугар сигэнэн киирэн толор эбэтэр электроннай аахтаны толорорго дааннайдаргын этэн биэр дииллэр.

Дьиҥнээҕинэн, сигэ сымыйа саайтка тиэрдэр, онно пааспарыҥ дааннайын уонна баан реквизиттэрин киллэр диэн «көрдөһөллөр». Дьэ манныкка киирэн биэрдэххинэ, харчыгын да сүтэриэххин эбэтэр холуобунай дьыала кыттыылааҕа буолан хаалыаххын сөп дииллэр куттал суох буолуутун эспиэрдэрэ.