Түөкүттэр дьиэтээҕи чаты туһанан, «Госуслуги» портаалга киириэхтэрин сөп

Полиция албын дьиэтээҕи чаттарга ыытар түөкүн чат-бот сигэлэрэ баар буолбуттарын иһитиннэрдэ.

Холобур, счетчигы  бэрэбиэркэлиир маннык биллэриини ыыталлар:

«Күндү олохтоохтор! Салайар хампаанньа сорудаҕынан уонна ОДьКХ былааннаах бэрэбиэркэтин быһыытынан, чугастааҕы кэмҥэ биирдиилээн уу счетчиктарыгар былааннаах бэрэбиэркэ ыытыллыахтаах. Ыйыллыбыт дааннай дьиҥнээҕин бэрэбиэркэлииргитигэр уонна бу чатка баар информацияны бигэргэтэргитигэр көрдөһөбүт».

Итини бигэргэтэр туһугар арай туран  Госөҥөлөр официальнай чат-боттарын нөҥүө регистрацияланыҥ диир эбиттэр.

Түөкүттэр өссө хайдах иһитиннэриини ыыталларый?

«Мин путевканы сүүйэрим чугаһаата, бэрт аҕыйах куолас эрэ наада»;

«Миигин блоктаан кэбистилэр, аккауммун төнүннэрэргэ көмөлөс, код ыыт»;

«Icloud-ка киирэр кыаҕым суох, оттон онно сөмөлүөтүм билиэтэ баар»;

«Өлбүт саллааты наҕараадалыыр туһунан петицияҕа илиитэ баттаа»;

«Көр, бу хаартыскаҕа/видеоҕа эн дуо?»

Түөкүттэр саҥаттан саҥа сылтахтары толкуйдаан иһэллэр, кинилэр соруктара биир: дьону албын сигэнэн киллэрэн авторизация кодун бэрдэрии эбэтэр буортулаах бырагырааманы туруортарыы.