Түөкүттэр, итирик суоппардар, баһаардар…

Ааспыт суукка иһигэр Саха сиригэр 10 буруйу оҥоруу бэлиэтэммит. СӨ Борокуратууратын пресс-сулууспата иһитиннэрэринэн, ити чахчыларынан бэрэбиэркэ ыытыллар. Ол курдук, Саха сирин олохтоохторо эмиэ түөкүттэргэ албыннаттылар.

Бу сырыыга кинилэр албастарыгар Дьокуускай куорат, Мэҥэ Хаҥалас уонна Нерюнгри оройуоннарын олохтоохторо (быраас, үлэтэ суох киһи уонна биэнсийэлээх) киирэн биэрдилэр. Хоромньу уопсай кээмэйэ — 1,2 мөл. солкуобай.

Маны таһынан, өрөспүүбүлүкэ киин куоратыгар уоруу, КамАЗ массыынаны уоран күрэтии, сымыйа суоппар дастабырыанньатын туһаныы чахчылара бэлиэтэннилэр.

Өрөспүүбүлүкэ икки оройуонугар — Алдаҥҥа уонна Нерюнгрига итирик туруктаах иккиһин уруулга олоруу тахсыбыта бэлиэтэннэ.

Суукка иһигэр уопсайа 13 итирик суоппар тутулунна. Киһи өлүүлээх суол саахала тахсыбата.

Ленскэй оройуоҥҥа суоппар дьахтар «Тойота Лэнд Крузер» мааркалаах массыынатын түҥнэрбит. 55 уонна 69 саастаах пассажирдар эчэйэн, балыыһаҕа киирбиттэр.

Саха сиринээҕи ЫБММ  иһитиннэрэринэн, суукка иһигэр алта техногеннай баһаар таҕыста. Өлбүт киһи суох, биир киһи эчэйбит. Баһаарынайдар Нерюнгрига (кыбартыыра), Мархаҕа (гараас), Дьокуускайга (бөх уонна даача), Ньурбаҕа (дьиэ) уонна Өлүөхүмэҕэ (гараас) тахсыбыт баһаардары умулларыыга сырыттылар.