Түөкүттэр Нерюнгри үс олохтооҕуттан мөлүйүөнүнэн харчыны албыннаан ылбыттар

Нерюнгри улууһун 38 саастаах эр киһитэ куйаар ситимигэр биир кыыһы кытары билсибит. Кыыс инвестициянан дьарыктанарын уонна үчүгэй дохуоту киллэрэрин туһунан кэпсээбит уонна кинини криптовалютаҕа боруобаланарга эппит. Эр киһи итэҕэйэн, сымыйа брокердарга массыанньыктар счеттарыгар 2 100 000 солкуобайы ыыппыт. Онуоха кини хас да дьон араас счетугар ыытарын да дьиктиргээбэтэх.

35 саастаах дьахтар эмиэ эбии дохуот мэһэйдээбэт дии санаан, биир биллэрии сигэтинэн киирбитигэр, араас сорудахтар кэлэр бөлөхтөрүгэр киллэрбиттэр. Сорудахтар бастаан «табаарга лайкта туруор» диэн судургулар эбит, онтон табаары үрдүк сыанаҕа атыылыырга кинилэртэн атыылаһан ылыллыахтааҕын курдук сорудахтар кэлэн барбыттар. Онон эмсэҕэлээбит дьахтар 200 тыһыынча бэйэтин харчытыгар табаар атыыласпыт. Ол гынан баран, бэйэтин харчытын да, эбии дохуоту да ылбатах.
38 саастаах дьахтар мунньуллар бонус бырагыраамалаахпын диэн итэҕэппит киһиттэн улахан чэпчэтиилээх сыанаҕа  аэрогриль уонна суотабай төлөпүөн атыылаһарга быһаарыммыт. Киниэхэ 91 600 ыытан баран, сакааһын ылбатах, харчытын төнүннэрэр туһунан да көрдөһүүтүн ким да ылымматах.

Полиция үлэһиттэрэ эбии хамнас туһунан этиилэр мэлдьи кутталлаахтарын, куйаар ситимигэр итинник этиилэргэ сэрэхтээх буоларгытын санаталлар. Маҕаһыыннарга эбэтэр маҕаһыыннар саайтарыгар киирэн атыылаһарга сүбэлииллэр.