Түөкүттэр оҕону албыннаабыттар

Дьокуускай куорат борокуратуурата ИДьМ Силиэстийэлиир управлениета РФ ХК 159 ыст. 3 ч. (улахан кээмэйдээх түөкүннээһин) көтөхпүт холуобунай дьыалатын сокуоннайынан аахта.

Хара санаалаахтар Үөрэх министиэристибэтин үлэһиттэрэ аатырбыта буоланнар, Дьокуускай орто оскуолатын үөрэнээччитин өйүн баайан, төрөппүттэрин суотабай төлөпүөннэригэр баар баан сыһыарыыларын туһанан харчыны көһөттөрбүттэр.

Сокуоннай сааһын туола илик кыыс албыннатан, 100 тыһыынча суумалаах харчыны көһөрбүт, ону тэҥэ төрөппүттэрин аатыгар 210 тыһыынча суумалаах кирэдьиити ылан, биллибэт баан счеттарыгар ыыппыт.

Билигин холуобунай дьыаланан силиэстийэлиир миэрэлэр ыытыллаллар, силиэстийэ барыыта борокуратуура хонтуруолугар сылдьар.