Түөкүттэр аны омук сириттэн массыына аҕалабыт диэн албастаннылар

ИДьМ Мииринэй оройуонунааҕы полиция салаатыгар  түөкүттэргэ албыннатан  1 140 000 солк. суйдаппыт 39 саастаах Айхал олохтооҕуттан сайабылыанньа киирбит. Ол курдук атырдьах ыйын саҥатыгар эмсэҕэлээччи  Telegram мессенджергэ Европаттан массыына аҕалабыт диэн биир улаханнык биллибэт хампаанньа угуйугар түбэспит.

Ханаал 13 тыһыынча сурутааччылардаах, элбэх массыына хаартыскаларын ыытар, ону таһынан дьон ирэ-хоро кэпсэтэр эбит. Инньэ гынан эр киһи итэҕэйэн, менеджери кытары сибээскэ тахсан кэпсэппит. Эр киһи  2016 сыллаах Toyota Rav 4  массыынаны  1 200 000 солк. атыылаһарга сөбүлэспит. Түөкүн дуогабар оҥоробун диэн  пааспарын дааннайдарын итиэннэ  абаанса быһыытынан 312 000 солк. көрдөөбүт.

Сотору кэминэн түөкүн «таможеннай пошлинаны»  — 830 000 солк. ыыт диэбитигэр, эр киһи харчыны ыыппыт. Хомойуох иһин, бу кэнниттэн менеджер сибээскэ тахсыбатах. Онон, эр киһи түөкүттэргэ түбэспитин өйдөөн, полицияҕа сайабылыанньа киллэрбит.