Түөкүттэр пенсионертан QR-код көмөтүнэн 100 тыһыынчаны уордулар

Ленскэй оройуонун полициятыгар олохтоох киһи түөкүттэргэ түбэһэн харчытыттан мэлийбитин туһунан үҥсүү суруйбут.

Ол туһунан СӨ ИДьМ пресс-сулууспата иһитиннэрэр.

Пенсионерга Москва куорат быраабы харыстыыр уорганнарыттан төлөпүөннээбиттэр. Субуоннаабыт киһи пенсионер уурунуу счетуттан түөкүттэр харчы уста сатыылларын туһунан эппит. Ол кэннэ эмсэҕэлээччини кытары баан куттал суох буолуутун сулууспатын исписэлииһэ кэпсэппит уонна кырдьаҕас киһини харчытын устан, «безопаснай счёкка» ыытарыгар сүбэлээбит.

Пенсионер бааҥҥа тиийэн, банкомакка түөкүттэр ыыппыт QR-кодтарын туһанан, бэйэлээх-бэйэтэ харчытын ыыппыт уонна кини счетунан туһаналларыгар кыаҕы биэрбит, харчытын ыыппыт.

Кырдьаҕас 100 тыһыынча солкуобайыттан илии соттон хаалбыт. Аны онно сөп буолбакка, пенсионеры өссө 400 000 солкуобай суумаҕа кирэдьииттэ ылан ыыт диэбиттэр, дьэ, онно эрэ саарбахтыы санаан, полицияҕа үҥсүү суруйбут.

СӨ ИДьМ үлэһиттэрэ баан исписэлиистэрэ хаһан даҕаны харчыны «безопаснай счёкка» ыыттарбаттарын өйдөөҥ диэн сэрэтэллэр. Итинник түөкүттэр эрэ харчыны ыыттаралларын сырыы аайы иһитиннэрэллэр.