Түөкүттэр саҥа албастара

Түөкүттэр саҥаттан саҥа ньымалары толкуйдаан, туһаналлар. Бэл, киһи чиэһинэй майгытын кытта туһаныахтарын сөп.

Эмискэ билбэт киһигиттэн харчы кэлэр. Тута киһи эрийэн, харчыны алҕас ыыппытын этэр, төттөрү ыытаргар көрдөһөр. Чиэһинэй киһи харчыны төннөрөр буоллаҕа.

Оттон түөкүн бу кэмҥэ бааҥҥа эрийэн, алҕас ыыппыт сууматын төннөрөрү модьуйар. Баан харчыны төннөрөр. Ол түмүгэр, түөкүн икки төгүл харчытын төнүннэрэр.

Онон Киин Баан сэрэтэр: билбэт киһигититтэн харчы кэллэҕинэ, төнүннэрэ охсорго ыксаамаҥ. Буруйу оҥорууга кыттыгастаах буолан хаалыаххыт.

Хайдах гынабыт? Түөкүн харчыны төнүннэрэргэ модьуйар буоллаҕына, «баан нөҥүө төнүннэр, мин төнүннэрбэппин» диэн этиэхтээххит. Бу кэлбит харчыны туттан кэбиһэр эмиэ сыыһа. Онтон баан икки өттүттэн ыйыталаһан, балаһыанньаны билэн баран, быһаарыаҕа.