Түөкүттэр счетчиккын уларытабыт диэн албыннаан Дьокуускай куорат олохтооҕуттан 3,5 мөл. солк. уорбуттар

ИДьМ 2-с нүөмэрдээх полиция салаатын дьуһуурунай чааһыгар 68 саастаах биэнсийэлээх дьахтар тиийбит. Киниэхэ дьиэтээҕи счетчигы уларытабын диэн “Энергосбыт” сымыйа үлэһитэ мессенджеринэн төлөпүөннээбит.

Түөкүн счетчигы уларытарга сайаапкаҕа пааспар уонна тус дааннайдар наадалар диэн эппитин итэҕэйэн, дьахтар барытын этэн биэрбит. Маастар хаһан кэлэн счетчигы уларытар күнүн, чааһын ыйбыттар. Сотору кэминэн “Судаарыстыбаннай өҥө” порталын “бэрэстэбиитэлэ” төлөпүөннээн, кини аккаунун алдьаппыттарын туһунан иһитиннэрбит. Ону тэҥэ, 3 мөл. солк. уурунуута атын киһи счетугар баарын, ол киһи харчыны буруйу оҥорууга туһанарын, онон кини холуобунай эппиэтинэскэ тардыллыан сөбүн эппит. Куттаммыт дьахтар төлөпүөннээччилэр көмөлөһүөх буолан эрэннэрбиттэрин итэҕэйэн, кинилэр ыйыыларынан-кэрдиилэринэн, хас да күн устата бааҥҥа баран хаста да төхтүрүйэн мөлүйүөннүү сууманы ыыппыт. Өрөбүл буолан хаалбытыгар, түөкүттэр бэнидиэнньиккэ диэри кэтэс уонна өссө биир мөлүйүөнү ыытаар диэн көрдөспүттэр. Бу кэмҥэ дьахтар чугас дьонугар, доҕотторугар төлөпүөннээн туох буолбутун кэпсээбитигэр, түөкүттэргэ киирэн биэрбитин быһаарбыттар. Ол кэмҥэ эмсэҕэлээччи түөкүттэргэ номнуо 3,5  мөл. солк. ыыппыт эбит.

Аны иккис куурус устудьуона кыыс суотабай сибээс операторабын диэн төлөпүөннээбит киһиэхэ итэҕэйбит. Буруйу оҥорооччулар сибээс мөлтөҕүн иһитиннэрбиттэр итиэннэ киниэхэ кэлбит СМС коду этэригэр көрдөспүттэр. Салгыы эмиэ “Судаарыстыбаннай өҥөҥ” аккаунун алдьаппыттар, биһиги көмөлөһүөхпүт диэн эрэннэрбиттэр. Куттаммыт кыыс биллибэт дьоҥҥо итэҕэйэн, кинилэр “сүбэлэринэн” бэйэтин аатыгар кирэдьиит оҥорторо охсубут уонна банкомат нөҥүө түөкүттэр счеттарыгар ыыппыт. Түөкүттэр ити курдук албыннаан, итэҕэтэн устудьуон кыыһы мөлүйүөн аҥаарыттан ордук суумаҕа кирэдьииккэ ыйаабыттар. Бу туһунан ИДьМ телеграм ханаала суруйар.