Түөкүттэр Социальнай пуонда үлэһитэ буолан кубулуналлар

Ис дьыала министиэристибэтэ иһитиннэрэринэн, түөкүттэр аны аҕам саастаах дьон биэнсийэлэригэр эбии төлөбүрүнэн киирэн, албынныыр буолбуттар.

Түөкүттэр угаайыларыгар киирэн биэрии элбии турар.  Аны саҥаттан саҥа албастарын айа тураллар. Билигин биэнсийэни хос ааҕабыт диэн албынныыр буолбуттар.

Түөкүн Социальнай пуонда үлэһитэбин диэн эрийэр уонна «ааҕыллыбакка хаалбыт ыстаас баар эбит, онон хос ааҕыллан, эбии харчы түһүөҕэ» диэн этэр. «Сибилигин тэйиччиттэн оҥоруохпун сөп, онуоха төлөпүөҥҥэр СМС-нан кэлбит куоду этэн биэр», — диир.

Куоду билэн баран, түөкүн биэнсийэлээх бааҥҥа счетугар киирэн айбардыыр.

Онон хаһан да СМС нөҥүө кэлэр куоду этэн биэрбэт буолуҥ. Социальнай пуонда үлэһиттэрэ хаһан да кистэлэҥ куоду этэргэ көрдөспөттөр. Уопсайынан, атын эрэгийиэнтэн, билбэт нүөмэртэн эрийэллэрин ылбатах ордук. Оччотугар, биирдэ-иккитэ эрийэн баран, тохтууллар.