Түөкүттэр сүрдэнэн иһэллэр

Telegram-ҥа хара санаалаахтар билэр эбэтэр чугас киһигин өлбүт диэн биллэриини ыытар буолбуттар.

Биллэриини кытта омос көрдөххө «өлбүт киһи» хаартыскатын быһыытынан ылыныахха сөптөөх  файл сыһыарыллыбыт буолар. Ол гынан баран файл .apk диэн кэҥэтиилээх буолар, ол аата бу бырагыраамалаах код буоларын көрдөрөр.

Өскөтө туһанааччы бу файлы арыйдаҕына, Telegram аккаунун сүтэрэр. Ону тэҥэ вирус туһанааччы контактарыгар барытыгар үргүлдьү ааһа турар кыахтанар. Онон куһаҕан сонун да буоллар, ыгылыйбакка быһаарынар ордук.

* * *

Telegram-ҥа өссө биир албын схема баарын ИДьМ сэрэтэр

Түөкүттэр Telegram-ка дьону барытын долгутар тиэмэлэри булан, ыһыылаах-хаһыылаах ааттаан сигэлэри ыыталлар, олору баттаатыҥ да, төлөпүөҥҥэр эбэтэр көмпүүтэргэр вирустар киирэллэр диэн Ис Дьыала министиэристибэтэ сэрэтэр.

Холобур, “Сонуннары» сиһилии ааҕар туһугар баттаа диэн баран, байыаннай дьайыы бүтүүтүн туһунан сабаҕалааһыннаах сигэни ыытыахтарын сөп.

«Хара санаалаахтар социальнай суолталаах тиэмэлэри анаан-минээн туһаналлар, дарбатыылаах тыллары тутталлар, ол гынан баран сүрүн сыаллара — харчыны уоруу буолар,» — диэн таһаарыыга этиллэр.