Түөкүттэр Тelegram куоластааһыны туһанар буолбуттар

Түөкүттэр сымыйа куоластааһын сигэлэрин туһанан Telegram аккауннарын уорар буоллулар. Бу туһунан Ис дьыала министиэристибэтин кибер-буруйу оҥоруу утары охсуһар управлениета иһитиннэрэр.

Биһиги олохпутугар араас куонкурустары, күрэхтэһиилэри куоластааһынан быһаарыы киирбитэ ыраатта. Сигэни баттаан, сөбүлүүр ырыаһыппытын, о.д.а. талабыт, туохха эрэ кыттыгастаах курдук сананабыт. Аны онтукпут кытта кутталлаах буолбут.

Сигэлээх иһитиннэрии киһиэхэ өр кэмҥэ интэриниэтинэн билсибэтэх киһититтэн кэлэр эбит диэн биэдэмистибэ чуолкайдаата.

“Дорооболоруҥ, баһаалыста, оҕолор куонкурустарыгар Наталья Юрьевнаҕа куоластаа”, — диэн управление түөкүттэр суруктарын холобур аҕалар. Сиэртибэ бу сигэни баттаата да, аккауна түөкүттэргэ барар.

Биэдэмистибэ дьону сэрэхтээх буолалларыгар уонна итинник саарбах сигэлэри баттаабаттарыгар ыҥырар.