Түөкүттэр түбэһэр күннээхтэр эбит

Саха сирин полицейскайдара түөкүттэртэн эмсэҕэлээбит дьоҥҥо харчыларын төнүннэрэргэ көмөлөстүлэр.

Саха сирин силиэдэбэтэл полицейскайдара 51 саастаах  Ленскэй олохтооҕор, түөкүттэргэ суйдаппыт харчытын төннүннэрэргэ көмөлөстүлэр. Кини былырыын күһүн ыраахтан олорон албынныыр түөкүттэр угаайыларыгар киирэн биэрэн, 2 300 000 солк. суйдаппыт.

Полиция үлэһиттэрэ быһаарбыттарынан, эмсэҕэлээччигэ сымыйанан пенсионнай пуондаттан, салгыы быраабы араҥаччылааччылар, өссө Киин баантан, өҥөнү оҥорор порталтан аатыраннар эрийтэлээбиттэр. Оннук үлтү бутуйаннар, бу киһи кинилэр эппит счеттарыгар балачча элбэх харчытын ыытан кэбиспит.

Эмсэҕэлээччи сайабылыанньатынан РФ ИДьМ Ленскэйдээҕи отделын силиэдэбэтэлинэн РФ ХК 159 ыст. 4 ч. холуобунай дьыала тэриллибит.

Суһал-көрдүүр тэрээһининэн уонна Саха сиринээҕи холуобунай ирдэбил оперативниктарын, Сочитааҕы кэллиэгэлэрин кытта бииргэ үлэлээһиннэринэн, 34 саастаах дроппер тутуллубут.

Бу киһи счетугар 26 мөл. тахса харчылааҕа биллибит. Ол кыттыгастарын кытта дойду араас эрэгийиэннэрин олохтоохторун албыннаан ылбыт харчылара.

Билигин өрөспүүбүлүкэтээҕи суут уоргана эмсэҕэлээбиттэргэ харчыларын төннөрөргө көҥүлү биэрбит. Мордовияҕа Рузаевка к. олорор эмсэҕэлээбит киһиэхэ 865 000 солк. ыытыллыбыт, ону таһынан 8,5  мөл.солк. Вологодскай уобаласка Череповец олохтооҕор төннөрүллүбүт. Түөкүттэртэн эмсэҕэлээбиттэргэ баан харчыларын ыыталыыр.

СӨ ИДьМ пресс-сулууспата