Түөкүттэр Visa уонна Mastercard карталары хаттаан сөргүтэбит диэн албынныыллар

Түөкүттэр Арассыыйаттан тахсыбыт Visa уонна Mastercard баан каарталарыгар хаттаан киириини сөргүтэбит диэн Арассыыйа олохтоохторугар этии киллэрэн эрэллэр.

Биэдэмистибэ иһитиннэрбитинэн, түөкүттэр дьону сымыйа баан саайтыгар киирэр сигэни тутуһалларыгар көрдөһөллөр, онно тутта сылдьар каарталарын реквизиттэрин киллэрэллэрин ирдииллэр. Итинник ньыманан түөкүттэр харчыны уонна тус информацияны уораллар.

Бу иннинэ Росхаачыстыба эмиэ итинник албын схема баарын иһитиннэрбитэ. Түөкүттэр Visa уонна Mastercard каарталар толору үлэлииллэрин төннөрөр туһунан Сбербаантан сымыйа смс-иһитиннэриини  ыыталлар. Туһанааччылартан каартаны түргэнник “бэрэбиэркэлииргэ” көрдөһөллөр, бу сигэни баттаатыҥ да, тус дааннайдарыҥ сымыйа страницаҕа бара тураллар.

Visa уонна Mastercard төлөбүр систиэмэлэрэ 2022 сылга Арассыыйаҕа үлэлииллэрин тохтотор туһунан биллэрбиттэрэ. Арассыыйа бааннара таһаарбыт каарталара тас дойдуга үлэлээбэттэр эрээри, дойду иһигэр үлэлэрин салҕаабыттара. Ол гынан баран ааспыт сыл бүтүүтүттэн Visa уонна Mastercard каарталарыгар баар чииптэрин куттала суох буолууларын сэртипикээтэ болдьоҕо бүтэн эрэр.