Түөкүттэрбит сүрдэммиттэр, аны буруйу оҥорорго күһэйэр буолбуттар

Саха сиринээҕи эрэгийиэни салайар киин социальнай ситимнэринэн кэлин түөкүннээһин саҥа ньымата тарҕаммытын бэлиэтээбит. Аны түөкүттэр дьону буруйу оҥорорго күһэйэр буолбуттар.

Саха сирин олохтоохторугар билбэт киһилэрэ төлөпүөннээн “анал сулууспа” эбэтэр “ураты подразделение” үлэһитэбин диэн бэйэтин билиһиннэрэр эбит. Итиэннэ, холобур, “үөһээҥҥи суһал сорудаҕынан” бэнсиин атыылаһан банкоматы уматыҥ диэн итэҕэтэ, тылларыгар киллэрэ сатыыллар эбит.

Кыраттан уолуйар, айманар дьон түөкүттэр аптарытыаттаах дуоһунастаахпыт диэн сымыйанан өттөйүүлэригэр уонна кистэлэҥ диэн этиилэригэр киирэн биэриэхтэрин сөп. Бу курдук буруйу оҥоруу иһин холуобунай эппиэтинэскэ тардыллыахха, оттон түөкүттэр буруйа суох хаалыахтарын сөбүн туһунан бүгүн ИДьМ телеграм ханаалыгар сэрэтэллэр.

ИДьМ сэрэтэр:

— билбэт дьоҥҥутугар, өссө ити курдук ирдэбиллээх дьоҥҥо итэҕэйимэҥ

— төлөпүөҥҥүтүн тута араарыҥ!

— ити курдук ис хоһоонноох төлөпүөннээтэхтэринэ суһаллык полицияҕа төлөпүөннээҥ: 102 эбэтэр 112.

— бу курдук куттал үөскүөн сөбүн туһунан чугас дьоҥҥутун сэрэтиҥ.