Түөкүттэргэ 11 мөл. солк. харчытын уордарбыт

Дьахтар тэйиччиттэн түөкүттэр счеттарыгар 11 мөл. солк. кэриҥэ харчыны ыыппыт, итинтэн 5 мөл. солк. – бэйэтин уурунуута, 6 мөл. солк. – кыбартыыратын атыытыттан киирбит харчы. Бэҕэһээ 73 саастаах Дьокуускай куорат олохтооҕо дьахтар полицияҕа тиийэн сайабылыанньа суруйбут.

Саастаах дьахтар түөкүттэр сабыдыалларыгар быйыл тохсунньуттан ыла киирбитэ биллэр эбит. Баан куттал суох буолуутун хааччыйар сулууспата эрдэ кини ыытар харчытын (переводы) хаста даҕаны тохтоппут (блокировала). Ол эрээри, биэнсийэлээх дьахтар баан сулууспалаахтарын үҥсэн хаста даҕаны суруйбут эбит. Итини таһынан, баан куттал суох буолуутугар сулууспатын көрдөһүүтүнэн суһал үлэһиттэр эмиэ кэпсэтэ сылдьыбыттар, дьахтар саарбах, билбэт дьоно киниэхэ дьайалларын букатын билиммэтэх.

Түөкүннээһин бу ньыматын туһунан сиһилии бүгүн кэпсиэхтээхтэр. Бу туһунан СӨ ИДьМ пресс-сулууспата иһитиннэрэр.