Түөкүттэргэ албыннаппыт дьахтар харчытын төннөрөөрү иккистээн албыннаппыт

Түөкүттэргэ албыннаппыт дьахтар харчытын төннөрөөрү иккистээн  угаайыга киирбит. Ол курдук, Мииринэй  олохтооҕо дьахтар иккистээн түбэһиитигэр 1,6 мөл.солк. сүтэрбит.

76 саастаах дьахтар ааспыт сыл кулун тутарга баан сымыйа үлэһиттэригэр 30 тыһ.солкуобайы албыннаппыт. Ити сыл атырдьах ыйыгар 600 тыһыынчаны сүтэрбит. Алтынньыга 700 тыһыынчаны уордарбыт. Бачча элбэхтэ албыннатан баран дьахтар өйдөммөтөх. Былдьаппыт харчытын төннөрөөрү интэриниэт ситимин нөҥүө юридическай хампаанньаны булан көмөлөһүннэрэргэ санаммыт.  Сымыйа юристар киниттэн 1 620 тыһ.солкуобайы сойбоппуттар.

Аҕам саастаах дьон итэҕэйимтиэлэрэ бэрдиттэн саамай көмүскэлэ суох дьон буолаллар. Онон кинилэри кытта аһаҕастык кэпсэтэн, төлөпүөн, интэриниэт ситимин нөҥүө билбэт дьонноругар итэҕэйбэт буолууларын туһунан сүбэ-ама биэрэр наада.