Түөкүттэри утары охсуһуу кэнсиэпсийэтэ ылылынна

Түөкүттэри утары охсуһарга кэлим сыыппара платформата баар буолуоҕа. Манна быраабы араҥаччылыыр уорганнар, Киин Баан, бааннар уонна суотабай сибээс тэрилтэлэрэ сүбэлэрин холбоон, түөкүттэри тутарга суһаллык үлэлиэхтэрэ диэн СӨ юстицияҕа судаарыстыбаннай кэмитиэтин бэрэссэдээтэлэ Павел Иванов «Якутия24» биэриитигэр кэпсээтэ.

— РФ бырабыыталыстыбата биллэрбит онлайн-түөкүттэри утары охсуһуу кэнсиэпсийэтин чэрчитинэн, бу үлэ ыытыллар. Кэнсиэпийэ үс сүрүн тутуллаах. Бастакытынан, РФ Холуобунай кодексыгар уларыйыылар киириэхтэрэ — онлайн-түөкүттэргэ накаастабыл кытаатыаҕа. Иккиһинэн, анал сыыппара платформата оҥоһуллан, быраабы харыстыыр уорганнар, Киин Баан, бааннар уонна суотабай сибээс тэрилтэлэрэ бииргэ үлэлиир буолуохтара. Үсүһүнэн, буруйу оҥоруу түбэлтэтэ уорбаланнаҕына, баан эпэрээссийэтин түргэнник тохтотор мэхэньиисим киириэҕэ, — диэн кини кэпсээтэ.

Павел Иванов иһитиннэрбитинэн,  Саха сиригэр былырыын онлайн-түөкүннээһиҥҥэ буруйу оҥоруу 29%-нан эбиллибит. 2023 сылга 3535, былырыын 4588 буруйу оҥоруу оҥоһуллубут.

Түөкүттэр сиэртибэлэринэн аҕам саастаах дьон эрэ буолаллар диэн сыыһа өйдөбүл. Былырыын түөкүттэр сиэртибэлэрин 37%-ра — 32-49 саастаах дьон, 14%-ра — 18-24 саастаахтар, 14 %-ра — 50-59 саастаахтар, 21%-ра — 60-тан аҕа саастаах дьон.

Ол иһигэр: үлэлиир дьон — 40%, биэнсийэлээхтэр — 16%, бастайааннай дохуота суох дьон — 22%, устудьуоннар — 11%, судаарыстыбаннай сулууспалаахтар — 10%, урбаанньыттар — 1%.

Ил Дархан, бырабыыталыстыба пресс-сулууспата