Түөкүттэртэн дьону быыһаабыт баан үлэһиттэрин наҕараадалаатылар

Түөкүттэртэн дьону быыһаабыт баан үлэһиттэрин наҕараадалаатылар. Ол курдук Арассыыйа баанын салаатыгар саамай болҕомтолоох, эппиэтинэстээх үлэһиттэр дьону түөкүттэр угаайыларыттан быыһаабыттар. Уопсайа 22 үлэһит наҕараадаланна.

Арассыыйа баанын Саха сиринээҕи салаатын салайааччытын аатыттан «За защиту финансовых интересов клиента» диэн өйдөбүнньүк бэлиэлэри туттулар.  Антон Коноплев баан үлэһиттэригэр махтанна.

«Эһиги кэллиэгэлэргитигэр үтүө холобур буолуоххут диэн эрэнэбин. Эһиги баан систиэмэтигэр дьон итэҕэлин бөҕөргөтөҕүт. Түөкүттэртэн өрүһүйбүт дьоҥҥут сэрэхтээх буолуохтара», — диэтэ Антон Коноплев.

Маны сэргэ салаа салайааччыта бэлиэтээбитинэн, баан үлэһиттэрин сүрүн соруга — туһанааччылар бырааптарын көмүскээһин буолар.

Ол курдук Дьокуускайга Сбербаан үлэһитэ Степанида Крылова алдьархай тахсыаҕын тохтоппут. Аҕам саастаах эр киһи счетуттан харчы устаары ыксаан кэлбитин көрөн дьиктиргээбит уонна түөкүттэр угаайыларыгар түбэһэн эрэрин сэрэйбит, «Безопасность» кунуопканы баттаабыт. Бэрэбиэркэ кэмигэр быһаарыллыбытынан, эр киһиэхэ билбэт нүөмэриттэн эрийэн «Домофон сулууспатыттан» эрийэбит диэбиттэр.  Кэлин бу аҕам саастаах киһи кыыһа кэлэн баан үлэһитигэр махтаммыт.